CEBU, Philippines - Si Wendell tulo na ka adlaw nga naputos sa kalibog ug kaguol. Hangtod karon naglisod pa siya sa pagdawat sa kamatuoran nga mahanaw na kaniya si Nora sa dayon. Wala siya magdahom nga isalikway ba siya ni Nora ug nipabor ni Billy nga hapit na mahimo nga senior citizen.
Si Billy wala gayoy bawot kun itandi ni Wendell sa hitsura ug sa pagkabatan-on. Ang bugtong lang niyang dag-anan batok sa naulahi mao ang iyang pagka propesyonal ug ang iyang katakos sa pag-awit.
Kay si Billy usa man ka soloist sa usa ka sikat nga banda sa Dumaguete kaniadto. Ang naasoy na nga banda naglangkob usab sa sikat nga mga ngalan sa industriya sa musika sa dakbayan sa Dumaguete nga sila si Mercy, Sollie, Jerben, Sammy, ug Marvin. Apan kun singer man si Billy “tall, dark and handsome” man pod siya. Ang dag-anan ni Billy batok kaniya mao nga wala siyay tarong nga trabaho.
Napamalandong karon ni Wendell nga ang uban nga mga babaye dili lang mangita og guwapo kun dili ila kini nga sutaon kun makabuhi ba kini o kaha propesyonal ba kini.
Si Wendell maayo og trabaho kaniadto kay usa man siya ka salesman sa tambal sa usa ka multi-national corporation.
Apan, pipila ka bulan gikan sa iyang pagtrabaho gitaktak siya sa kompaniya nga iyang gitrabahoan. Kay ma short man siya kanunay sa iyang remittance gumikan sa iyang pagka “playboy” ug pagkapalahubog. Kun wala pa siya magbinuang sa iyang trabaho dili unta mahanaw kaniya si Nora. Ug sa unang higayon nagminatay sa paghilak si Wendell.