Kadtong nangapilde...

Sa matag eleksiyon, bisag unsa nga eleksyon, eleksyon pagka-class president, o eleksyon sa alumni association, sa kapilya, sa civic organization, o pagka-Gobernador o pagka-Mayor, duna gyuy mapilde. Ang-ang og makadaug ang tanan.

Di sad mahitabo nga mapilde ang tanan. Di na matawag nga eleksyon kun walay mapilde o walay makadaug. Maoy hinungdan nga kun makahukom ka nga mag-kandidato, uban sa pagtuo nga mudaog, kay kinsa may molansar aron mapilde, kinahanglan nga i-condition usab nimo ang imong kaugalingon sa kahigayonan nga mapilde.

Aron nga kun unsay mahitabo, kun mapilde man, dili kaayo sakit hunahunaon tungod kay giandan na man nimo ang imong kaugalingon kun unsa man ang mahitabo. Mao kini ang nahitabo sa miaging eleksyon, sama sa nangaging mga eleksyon. Sa ato pa, normal ang nahitabo sa nangapilde.

Hinoon, alang sa mga hingtungdan, sakit gyud bation ang kapildihon, bisan og imo nang gikondisyon ang imong kaugalingon nga mapilde. Tuod man, ang tanang nagkandidato nagtuo gayud nga mudaog. Ug mao kini ang nakadugang sa ka-sakit. Mao kini ang nakadugang sa kaguol ug frustration.

Ug mao ni ang hinungdan nga di gyud ko molansar tungod kay di gyud ko kadaug. Magsakitsakit lang unya ko sa akong dughan inigkapilde na. Alang nako, nganong tuyoan man usab nako ang maong sitwasyon nga daan na man kong nahibawo nga di gyud ko mudaog?

Busa, maoy atong panghinaut nga sa sunod nga eleksyon, diyutay ray manglansar, aron diyutay ra say masakitan inigkapilde na. Apan, dili angayan ikasakit ang kapildehon.

In fact, kun buot hunahunaon, daghan kita’g maani nga mga leksyon gumikan sa mga kapakyasan nga atong masinati.

 Si Adel Tamano, usa sa akong gibotohan pagka-Senador, sa miaging 2007 election, nagkanayon, tapus sa iyang kaparutan, nagkanayon: ”I’m a failure. And I’m not ashamed of it. We often learn our best lessons from the times we don’t succeed.” Mibotar kong Adel kay nagtuo ko nga mas maayo pa siya kay ni Lito Lapid. Anyway, tinuod ang iyang giingon nga daghan kita’g makat-onan gikan sa mga kapakyasan nga atong mahiaguman. Kadtong mga naparot sa miaging eleksyon, ayaw ka-discourage. Instead, hunahunaa where you went wrong. Hinumdomi nga si Richard Nixon, napilde paglansar niya pagka-Gobernador ba kadto, apan, midaug pagka-Presidente sa Amerika. Sa ato pa, sama kang Adel Tamano, usa usab siya ka failure.

Sa dili pagpasangil ni bisan kinsa o sa bisan unsa, dawata graciously ang kaparutan, ayaw ikasakit o ikauwaw, kundili, himoa kining kahigayonan pag-usisa sa inyong kaugalingon, unsa ang mga apan, unsa ang mga minus factor, diin kamo nasayop sa inyong mga desisyon, ug nganong gi-overlook ninyo ang mga plus factor sa inyong mga kaatbang.

Indeed, daghan kita’g makat-onan gikan sa atong mga kapakyasan. Ug sa mga midaug, be humble, be magnanimous in your victory.