Angayang bantayan sa Undas

CEBU, Philippines - Matud pa nila, “all roads lead to the cemetery” kay atong gihandum ang adlaw sa mga minatay.   Nahimo na kining usa ka tradisyon natong mga Pinoy ang paghandum sa atong mga minahal sa kinabuhi nga mitaliwan na ngadto sa laing kalibutan pinaagi sa pag-offer og pag ampo, pagbisista sa mga sam-ang, pagdagkot og kandila ug paghalad og mga bulak ug uban pa.

Gani karong adlawa, daghan na ang nagpanon ngadto sa mga sam-ang aron bisitahon ang ilang mga kabanay nga nag-una na kanila. Kung wa ko masayop halos tanang tawo sa panimalay mouban gayud, hasta gani ang atong mga katabang sa panimalay mananghid pod nga mouli sa ilang probinsya aron pod moduaw sa ilang minatay.

Ang uban gani mopahimulos na sa mubong panahon aron makabakasyon ug pipila lamang ka adlaw. Kay manglakaw man ang tanan ug wala nay' ibilin sa panimalay, hinaut nga inyong masiguro pagsunod ang pipila ka mga pahimangno aron sa inyong pagbalik luwas kini sa mga kawatan ug sa sunog.

1. Una sa tanan, sa dihang mobiya na kamo sa inyong panimalay kinahanglan nga inyong masiguro og ibot ang tanang gipangsaksak nga mga appliances nga wala gamita. Mas maayo gani ug pawngon tanang mga appliances ug walay ibilin nga nag andar og dayong palong sab sa plangka.

2. Isigurado usab nga ang LPG valve inyong ma-off. Kun ugaling dunay hungaw, dili kini magpuot kay nakasirado man ang regulator niini. Mas labing maayo og ilisan nang daan ang hose kun inyong namatikdan nga duna kini hungaw aron masiguro gyud nga walay delikado sa atong pagbiya sa panimalay.

3. Daghan baya kanato ang magdagkot og kandila sa panimalay para pod lagi unta sa mga kalag nga libodsuroy kay ilaha baya kining adlaw maong maglaroylaroy pod kini sila. Isigurado gyud nga sa inyong pag biya inyo kining palongon aron hingpit nga layo sa sunog.

4. Mas labing maayo kung dunay mabilin nga tawo sa atong panimalay.

5. Aron hingpit pod nga makalikay sa operasyon sa mga akyat bahay nga mosiaw ning mga panahona, isiguro gyud nga naka-lock ang tanang pultahan sa panimalay. Ibotang og siguro ang iro sa atubangan sa pultahan aron magduhaduha ang mga sagbot sa katilingban nga mopahimos sa higayon.

Pipila lamang kini ka mga sugyot aron hingpit nga luwas atong panimalay sa sunog ug sa pag-atake sa mga kawatan. Mas maayo man nga sa atong pagbiya o pagbakasyon kampanti kita nga luwas atong panimalay sa kadaot nga mamugna unya sa sunog ug ngadto usab sa mga akyat bahay nga mupahimulos sa panahon.

Ang inyong kabomberohan uban sa nagkalainlaing ahensiya sa gobyerno nagpabilin nga naka-heightened alert aron sa pagsiguro nga hapsay ug malinawon ang atong pagtimaan sa adlaw sa minatay. .Happy halloween!

Sa pikas bahin, tugoti ko paglakbit og gamay sa nagmalamposon nga Barangay ug Sk Elections nga gipahigayon niadtong October 25, 2010. Ang kinatibuk-ang assessment sa atong kapolisan ug COMELEC sa maong eleksyon kay nagmalinawon ra kini ug nahuman ra gayud nga hapsay.