EDITORYAL - Unsay relevance sa SK

Sa piniliay sa miaging Lunes nabaniog ang daghang kahiwian nga gihimo sa mga kandidato sa Sangguniang Kabataan (SK) nga kinopya gikan sa mga hamtong nga politiko nga tataw kaayong kaantigo na sa gitawag nilang “minaro” nga paagi sa pagpapili.

Dinhi natataw na kaayo nga ang mga batan-on kinsa giingong maoy mahimong dugokan ug paglaum sa nasud ugma damlag maoy mopadayon sa dili desenteng matang sa eleksyon sa nasud sa umaabot pang panahon.

Sa laktod, ang pangindahay sa kadaghanan nga makabaton og “honest election” ang nasud, election ra gyu’y mahabilin walay honest.

Taym pa sa pagmugna sa atong mga magbabalaod sa balaod bahin sa SK election, gitun-an ba nila pag-ayo kun unsay relevance niini? Nakapangutana ta niini kay nasabtan nato nga mura lang og “trial and error” kining balaora.

Unsa ba gyu’y papel sa mga batan-on diha sa kabarangayan? Wala ba sila’y labot sa pag-atiman sa mga opisyal sa barangay nga gipili sa mga molupyo nga modumala sa barangay?

Sa mga batan-ong nabuang sa ginadiling drugas, nahimong mangtas nga kriminal gumikan sa maong bisyo, may nahimo ba ang mga opisyal sa SK sa pagsumpo kanila?

Sa laktod, kun ang tumong sa pagmontar og mga opisyal kunohay sa mga batan-on sa barangay mao nga aron lamang mokunhod ang dautang bisyo sa mga batan-on, misalir ba ang maong pangandoy?

Wala kaha kini mag-usik lang sa kuwarta sa gobyerno kay nahulog naman lang nga duplikasyon ang pagbutang kanila diha sa barangay, lungsod, syudad ug lalawigan ug sa tibuok nasud kay ang ilang mga trabaho mahimo ra man sa nanagdumalang opisyal sa barangay?

Sayop kaha si Senador Edgardo Angara sa iyang sugyot nga angay na wagtangon ang SK election? Mao kini angay hinuktokan sa atong mga karpentero sa balaod.