EDITORYAL - Ang voter's list sa Comelec

Sa eleksyon niadtong Lunes, daghang botante nga naglagot kay nagkadusingot sila pag-adto sa sentrong botahanan , apan wala sila makabotar kay wala na ang ilang ngalan sa listahan sa Comelec.

Naglibog sila kay nakabotar man sila niadtong miaging eleksyon sa Mayo 10 ning tuiga apan niadtong Lunes wala naman ang ilang ngalan.

Ang sunod nga eleksyon unya na sab sa 2013, unya mao lang gihapong problemaha ang masugatan sa katawhan tungod kay nahimo man kining perennial problem sa Comelec nga murag gituohan nilang di na gyud masulbad.

Mas makatarunganon ang taga DepEd nga nahimong perennial problem ang kanihit sa lingkoranan ug classroom matag abli sa klase kay pandayunon pa man ang maong mga pasilidad.

Apan ang problema sa Comelec dili sama kabug-at sa suliran sa taga DepEd matag abli sa klase, kay kun atimanon lang gyud sa taga Comelec ang ilang trabaho inighuman sa eleksyon, malimpyo man gyud tingale ang ilang listahan.

Sama pananglitan, bisan ila nalang janitor maoy paadtuon sa buhatan sa Cebu City Health Office (CHO) sa pagpangayo og lista sa mga namatay nga Sugboanon, matag tapos sa buwan, ma-update nila ang ilang listahan kun kinsay namatay nga botante matag buwan.

Kini tungod kay inigkamatay sa tawo awtomatik man nga iparehistro kini sa tagtungod ngadto sa    CHO una ilubong ang ilang minatay, busa makahimo pa gani ang Comelec sa paglaksi sa botanteng mamatay gikan sa ilang listahan , bisan hapit na ang adlaw sa piniliay.

Apan ambot ngano kaha nga may tagkapin mang tulo na ka tuig nga namatay ang botante, unya naa man lang gihapon sa listahan sa Comelec.

Unya ang ngalan hinuon sa dakong buhi nga botante mao may mawagtang.

Mao bitaw nga dili nato mabasol ang mga botante nga mohingalan sa taga Comelec nga nagmika ug wala mag-atiman sa ilang trabahuon tungod ning maong mga kamatuoran.