Maganda ang Pilipinas

Itong Pilipinas ay magandang bansa

maliit nga lamang pero pambihira;

tatlong pulo itong may sariling wika

sa mapa’y tingnan mo at kahanga-hanga!

Naliligid ito ng ilog at dagat –

kaya mga tao’y hindi nagsasalat;

sa dagat at ilog ang isda’y masarap

sa bayan at nayon may pagkaing sapat!

Tingnan ang paligid at mapagmamasdan

luntian ang gubat – sa hayop mayaman;

sa buong paligid bundok ay naglisaw

nagtatanod ito sa sigwang daratal!

May mga panahong bagyo’y dumarating

ang dumi sa bansa’y winawalis mandin;

tahanang nawasak naitatayo rin

tahimik ang lahat kung gabing madilim!

May mga panahong mga taong labas

at ang mga taksil nagsasamang lakas;

sila ay supil din ng maraming armas

ng mga sundalong sa baya’y matapat!

At sa bansang ito ay mayrong halalan

mabubuting lider ay naglalabasan;

may lider na hudas may lider na tunay

mabubuting lider ang nagtatagumpay!

Palibhasa’y bansang may takot sa Diyos

mga mamamayan matapat maglingkod;

ang bata’t matanda ay nakalulugod

mabubuting lider siyang sinusunod!

Kung may naghihirap saka nagugutom

sila’y mga taong ang diwa’y paurong

maraming gawain ay ayaw tumulong

kuntento sa buhay na mali ang misyon!

Kaya sa Philippines kay sarap mabuhay

lalo’t ang puso mo ay tapat sa bayan;

kahi’t may sakunang umalis dumatal

ang tao’t gobyerno ay nagtutulungan!