Lisud ba gud tubagon?

Alang nako, makauuwaw kaayo alang kang Atty. Evelyn Carmelita Misal nga wala motubag dihang giingnan ni LTFRB-7 regional director Benjamin Go nga usa sa “most guilty” sa anomalosong pagpalusot og taxi franchise.

Gawas sa pagpanglipaghong sa dagway ni Atty. Misal, wala siya’y nahatag nga tubag dihang gipangutana ni Go kun ngano nga bisan og dunay kamandoan gikan sa LTFRB-Manila nga dili usa mangisyu og taxi franchise sukad niadtong 2003, miinsister man gihapon siya.

Matud ni Go, atul sa hearing unta niadtong miaging Huwebes, nga duna siya’y mga dukomento nga magpakita nga si Misal usa sa mi-endosar nga aprobahan sa nangaging regional direktors sa LTFRB ang dugang mga prangkisa sa taxi.

Isip abogado, si Atty. Misal dili unta maglisud pagtubag sa sayon ra kaayong pangutana sa iyang direktor. Bisan sa dihang gipangutana na siya sa mga reporters, dili gihapon motubag si Atty. Misal.

Bi, nganong ang tanang mga hearing officers sa LTFRB dili man makatubag niining maong punto? Apil na si Atty. Douglas Sanson nga nagsilbi gani nga assistant regional direktor, dili usab makapasabot.

Kun wala kamo’y labut sa dakung sindikato sa LTFRB-7 kabahin sa pagpang-isyu og illegal nga prangkisa, tubaga ninyo ang pangutana.

Unya, ang abogado usab ni taxi operator Richard Peter Corominas nga si Manuel Momongan daw sa nahadlok usab nga motubag sa “main issue” og hinoon midangop sa technicalities aron dili madayon ang hearing.

Ang paagi sa mga sakop sa sindikato diha sa LTFRB mao nga kun dunay taxi operator nga mo-apply og renewal sa ilang taxi franchise, dugangan man nila og laing tulo o upat ka prangkisa.

Matud ni Richard Cabucos, ang presidente sa Metro Cebu Taxi Operators Association, nga kaniadto ang prangkisa gibaligya og tag P40,000 pero karon akong nahibaw-an nga moabut na og tag P100,000 ngadto sa P120,000.

Kun imong i-multiple sa kapin sa 2,000 ka additional franchise nga naisyu sa mga sakop sa sindikato gikan niadtong 2003 hangtud karon, pila kaha’y ilang nakwarta?

Paminaw nako hapit matag adlaw pwerteng punoa sa bulsa niadtong mga maldito kaayo nga kanhi regional direktors no nga nalambigit sa anomaliya?

Atong awhagon si direktor Go nga iyang pasakaan og kaso kining mga hearing officers nga nalambigit sa binuang, apil na kadtong mga regional direktor nga nakigkonsabo.

Tagsa ra mahitabo nga ang usa ka opisyal sa ahensya maoy mangunay sa pagbutyag og binuang sa iyang gidumala nga opisina. Mahimo kaha ni sa akong amigo nga si LTO-7 regional direktor Raul Aguilos?

Nalipay ko sa akong higala nga taxi operator kay gihatagan ko niya og “tip” (dili kwarta ha) kun unsaon pag-imbistigar ang mga binuang diha sa LTO nga naglambigit usab og mga opisyal sa maong ahensya.

Sigurado ko nga kun mahipos na nako ang mga dukomento, “mobuto” na usab kining maong isyu diha sa LTO.

* * *

Maisip na nga “One-on-One” ang fight karon sa barangay kapitan diha sa Lahug.

Si Art Barrit nga midagan milansar unta pagka kapitan sa Lahug ug higala sa mga opisyal sa BOPK, karon misibog na kay natudlo na man siya nga usa sa mga commissioners sa Cebu Port Authority.

Nagpasabot nga ang gisuportahan sa BOPK mao na lang ang makigtigi sa laing kandidato nga gipaluyohan usab sa oposisyon.

Para patas, dili lang nako sila hisgutan. Pareho nga dili nako kaila kining maong mga kandidato mao nga dili lang nako sila hisgutan.

Kun mangutana mo nako hain kanila ang maayo, dili ko makasulti kay wala gani ko makaatubang kanila sa personal.