EDITORYAL - Tulisan mat-an pa sa pukot

Ang mga tulisan mat-an pa sa pukot, ug gani una kini moatake sa ilang tulisonon ilabi na sa mga bangko maniid una kini unsay mga kahimanang pangproteksyon sa maong establisamento.

Sa usa ka prospect nilang tulisonon nga ilang ma-survey nga kompleto og kahimaman, usa ka paghikog ang ilang himoon kun mosungasong sila sa pagtulis niini.

Pipila sa labing lig-ong panalipod ug depensa sa usa ka establisamento batok sa mga dautang tawo, mao ang security guard niini.

Ang personalidad , panglawas ug kaabtik sa sekyu usa usab sa himbisanan sa mga tulisan.

Ikaduhang butang nga magsilbing panalipod sa bangko batok sa mga tulisan mao ang mga security camera niini, ang mga pultahan, ug ang palibot sa bangko, aron pagsusi kun asa sila lusot inig-ikyas nila.

Unya ang mga kahera ug uban mga kawani panid-an usab sa mga tulisan kundi ba kanunay lang magmika.

Sa laktod, kun ang usa ka establisamento masud-ong sa tulisan nga lisod sudlon gumikan sa kahugot og seguridad niini, dili sila magpatuga-tuga sa pagtulis niini.

Apan sa higayong masayran nila nga haguka kaayo ang siguridad sa usa ka establisamentong kuwartahan, dali ra kaayo sila makahimo og plano una mohimo og lakang sa pagpanulis.

Susama ang nahitabo niini sa Banco Maximo sa dakbayan sa Mandaue nga gitulis og udtong tutok sa tulo ka mga tulisan.

Usa sa nasud-ong mao ang kawalay security camera sa bangko ug edaran pa ang security guard niini.

Mao kini ang angayang hunahunaon sa usa ka manager o tag-iya sa mga establisamentong potential nga tulisonon kun gusto silang masalbar ang ilang buhatan gikan sa mga tulisan.