Pagka-isog g'yud!

Kining kawani sa City Hall nga misumbag sa market-in-charge diha sa Freedom Park angay g’yud nga imbistigahon og silotan.

Nagsalig ra man gud tingali kini si Ronald Badajos, usa ka utility worker sa Market Operations Division, nga duna siya’y higala nga konsehal.

Palabana unya nang imong higala nga konsehal Ronald sa higayon nga mataktak ka na sa katungdanan ug mabawian ka sa imong tindahan.

Sigurado ra ba g’yud ko nga dili ka mapasaylo ni Mayor Michael Rama sa pagsuntok nimo ni Market Supervisor Salvador Doctor.

Ngilngiga god nimo Do. Ayaw kaayo pagsalig nga daku ka’g lawas unya sayon-sayonon lang nimo ang nagdumala sa merkado.

Sa reklamo ni Doctor nga gipadala niya kang Rama nagsaysay kini nga gisumbag siya ni Badajos kaniadtong Oktobre 8.

Wala maglangan-langan si Mayor Rama pagtugyan sa maong kaso ngadto sa City Legal Office aron maimbistigahan kining maong reklamo ni Doctor.

Nakaila g’yud ko aning Doctor. Dili kini hambugero nga pagkatawo, hinayon gani nga manulti, apan nganong gisumbag man tawon nimo?

Kuyawa nimo Do og makasugat ka’g tawo nga init usab og ulo.

Maayong tagdon sa Market Authority kining reklamo ni Doctor kun nganong nahatagan man og stalls kini si Badajos diha sa Freedom Park.

Apil nga nahatagan og stalls mao ang iyang asawa, anak ug bayaw nga babaye. Matud ni Doctor nga ang ilang stalls mao ang Numbers 236, 235 ug 161.

Matud ni Doctor nga dunay ordinansa nga nagdili sa mga opisyal ug kawani sa City Hall nga maka-operate og mga stalls sa public market.

Kun tinuod kini, maayong hukasan kini si Badajos pagdumala og stalls.

Buyno, siguroa g’yod Ronald nga makatambong ka sa Market Authority karong Martes kay paminawon nato ang imong mga argumento.

* * *

Pwerteng nakahangyo sa Kapitan sa barangay Tinago nga unta dili lang iapil ang 16 ka stall holders kang kansang stalls nahimutang sa eskena Arellano Boulevard ug V. Sotto.

Husto g’yud ang baruganan ni Mayor Mike Rama, kana kun dili siya mag-usab-usab sa iyang baruganan, nga dili manghilabot sa maong isyu.

Ang Department of Public Works and Highways (DPWH) gusto nga mopalapad sa Arellano Boulevard aron ibalik ang gilapdon kaniadto.

Kining mga tawo nga miukopar sa karsada dili angay’ng manghilak kun ang gobyerno mogamit na pagbalik sa karsada.

Lapad kaayo kining Arellano Boulevard kaniadto apan tungod kay nangatulog ra man ang mga opisyal sa dakbayan, sa ilang pagmata gamay na ang karsada.

* * *

Panahon na lang g’yud ang gipaabot. Gitug-anan na ako ni LTO-7 regional director Raul Aguilos nga giuyonan na ni LTO Chief Virginia Torres nga ibalik ang pag-deputize sa Task Force Alpha.

Nalipay ko kay kun mabalik ang operation sa TFA daghang mga drayber magmatngon na g’yud sa pagmaneho.

Pagka karon, pwerteng daghana sa mga drayber nga malapason sa balaod.

Ang mga sakop gud sa TFA kun mag-operate walay daghang sabut-sabut, kun masakpan ka nga nakahimo’g salaud, sigurado ka g’yud nga maisyohan og TOP.

Dili sama sa ubang sakop sa CITOM nga adto g’yud magsuwat-suwat sa layo dayon motugot nga moduol kanila ang dinakpang drayber.

Ngano man g’yud nga adto ka man sa layo mag-isyu? Aron walay makadungog sa inyong sabut?