EDITORYAL - Prisyo sa kuryente di kabalak-an

Gikabalak-an nga kun mosaka ang bayranan sa kuryente mokibra usab ang gidaghanon sa mga turista nga mobisita nganhi sa Pilipinas.

Kun hisgotan kining isyuha, dili man kini makapakurat, tungod kay sa matag karon ug unya, wala mahitabong miatras ang prisyo sa mga palitonon sa nagkalainlaing butang sa tibuok kalibotan.

Matag karon ug unya mokalit lang pagsulbong ang prisyo sa mga mahinungdanong butang ilabi na dinhi sa nasud nga maoy gikinahanglan aron mobarog ang ekonomiya sa Pilipinas.

Matag higayon nga may kausaban sa usa ka sistema nga gisagop niining kinabuhia dili kalikayan nga mabug-atan ang tawo ilabi na kun hisgotan ang bahin sa prisyo sa mga baligya.

Apan sa higayong maanad ang tawo, malimtan ang  maong problema tungod kay naningkamot man usab nga makaapas ug makagukod sa dagan sa panahon.

Sa sinugdan bitaw wala kaabot og tagpeso ang litro sa gasoline, apan karon halos tag P50 na ang matag litro.

Ang laraw nga patas-an ang bayranan sa kuryente, daan na kining resulta sa taas nga prisyo sa gasolina, ug naanad na ang tanan niini.

Ang tinuod may nabalaka nga kun mosaka kuno ang prisyo sa kuryente mosaka usab ang bayranan sa mga hotel ug sa pagkaon busa wala nay magpanon nga mga turista nga moduaw sa Pilipinas kay mahimong moadto nalang sila sa Phuket, Thailand ug Vietnam kay barato ra kuno kaayo ang mga bayranan sa hotel ug pagkaon didto.

Apan ang pangutana, ang talan-awon o mga tourist destination sa Pilipinas makita ba didto sa Thailand ug Vitenam? Ang kuwartahan dili magsapayan sa kamahal o kabarato sa ilang gastohanan, ang mahinungdanon nga malipay ang ilang kaugalingon.