Multi-purpose gym alang sa Brgy. Zapatera

Bag-o lang naka-acquire og loti ang dakbayan sa Sugbo diha sa Brgy Zapatera, 355 sq.m., ug kini tukoran og multi-purpose gym alang ning maong barangay. Kini sumala ni Barangay Kagawad Jinggoy Reformina.

Ang Zapatera, usa sa pipila ka barangay ning dakbayan, ang walay gymnasium o auditorium. Sa atong nasayran, si Reformina, naningkamot nga ang ilang barangay makaangkon ning maong luna alang ning maong katuyoan nga dugay nang gihandom sa taga-Zapatera.

Ug matud pa, usa kini sa nakapaaghat ni Jinggoy pagdagan pagka-Punong Barangay sa Zapatera, diin matud pa, mao kini unya ang iyang hatagan sa unang mga pagtagad.

* * *

Dugaydugay ming nag-opisina sa Brgy. Kasambagan ning dakbayan, hinungdan nga miisip kami sa among kaugalingon nga mora lang pod mi’g taga-Kasambagan. Busa, concerned usab kami sa mga kalihokan ug kaugmaran niini.

Isip usa ka senior citizen, nalipay kita nga mihatag kanato’g pagtagad si Brgy. Captain Jose Lim, Jr. ug iyang mga sakop sa konseho, sama sa pagpahigayon sa libreng cataract operation nga gi-sponsor sa Sikatuna Love & Care; pag-donate og P1,000, ug pagtukod og muli-purpose building alang sa katuyoan sa mga senior citizen, women’s organization, ERPAT; ug ubang mga pundok sa barangay.

Mahitungod sa pag-maintain sa peace & order, misugilon kanato si Jun Sayson, atong kauban sa opisina, nga ilang gihimo ang roving matag gabii, ug gitukod ang police outpost sa eskina F. Cabahug ug Juan Luna Sts.

Unya, gihimo ang matagbuwan nga pulongpulong bahin a Dengue awareness sa tanang sitio sa Kasambagan, ug naghatag og libreng snacks alang sa kabataan. Alang sa clean and green project, ilang gi-improve ang garbage collection, paglimpyo sa clogged up drainage sa sitio Sigay, clean up drive matag ikaduha ug ikatulong semana sa bulan,

Drainage system sa sitio Panagdait, pagpatahum sa Day Care center, ug concreting sa pathway kilid sa tennis court.

Matud ni Jun, daghan pa siya’g isugilon bahin sa mga accomplishment ni Kapitan Joe Lim.

* * *

Bahin sa first 100 days ni Presidente Noynoy, wa kaayo ko magtagad niini. Alang nako, no big deal. Dili kalikayan ang mga pagsaway. Hunahunaa nga si Noynoy adunay 2,190 days sa pagpamunoan. Minus 100 days, duna pa siyay 2,090 days to go. Ato ning huwaton.