Ayoha gud ninyo

Kini bitaw’ng pagkuha og mga consultants diha sa City Hall angay g’yud tingali nga ayohon paghashas.

Mga higala nako nga opisyal sa dakbayan sa Sugbo mikwestyon sa pagkuha nga consultant sa sports sa asawa ni kanhi Konsehal Chris Alix.

Si Victoria Alix kuhaon ni nga consultant sa City Hall ug sweldohan og P18,000 ang buwan. Ang akong mga higala nga opisyal sa City Hall miawhag nga tukion kining maong isyu.

Matud nila nga kining asawa ni Alix wala man g’yud ni’y igong kasinatian sa sports ug salikwaot kaayo nga siya maoy himoong sports consultant sa mayor.

Tungod sa ilang mga kumentaryo gisusi nako ang background ni Victoria Alix.

Nakahuman si Victoria sa kurso nga Bachelor of Science in Community Nutrition ug human siya makahuman sa iyang pagtoon, mitrabaho siya isip medical representative sa usa ka drug company.

Executive director ug organizer kuno si Victoria sa Dancesport Team Cebu International Inc.

Sigun sa inandam nga draft contract nga pirmahanan nilang Victoria Alix ug ni Mayor Rama, gilatid nga si Victoria mohatag og tambag sa mayor sa mga isyu nga dunay kalabotan sa sports.

Ang lagda g’yud unta mao nga ang usa ka local government unit o ahensya sa kagamhanan mokuha lang og consultant kun sa iyang mga kawani walay makamao sa trabaho nga ihatag ngadto sa maong consultant.

Di ba kini man maoy lagda Mayor Mike? Ngano diay, mas nasayud pa ba diay kini si Victoria Alix kay kaninyo ni Vice Mayor Joy Young kun sports activities ang hisgutan?

Mosagop ko sa baruganan niadtong mga higala nako nga mireklamo. Usahay bitaw makapanglingo-lingo ko niining atong mga opisyal sa dakbayan.

Kun dili ang mga kanhi konsehal o opisyal sa City Hall maoy i-hire pagka consultant, ang asawa. Duna say usa ka tawo nga gikuha gihapon sa dakbayan isip consultant bisan hapit na gani dili makalakaw.

Naunsa na man tawon mo uy!

* * *

Tinuod ba kining report nga akong nadunggan nga dunay mga opisyal ug kawani sa City Hall nga ang trabaho mao ang pagpangita kinsa ang tag-iya sa mga yuta nga nagamit isip karsada?

Lain pa kining salawayon kay kining maong mga tawo, naglakip sa pipila ka kawani sa City Treasurer’s Office, maoy kusug kaayong mangita sa mga tag-iya o ilang mga kabanay.

Ang maong mga tag-iya sa yuta mipagamit ra unta sa ilang yuta nga gamiton isip karsada, apan kining maong mga mapahimuslanon, nangita kanila kay aron hulhogan nga modemanda og bayad sa syudad.

Aw kamo na lay huna-huna diha kun unsay ilang tumong nganong gusto g’yud nila nga makabayad ang dakbayan.

Maayo ra ba og gamay ang kantidad, tag-kapin sa milyon ka pesos ang kantidad bisan gamay ra kaayo ang luna nga nagamit sa karsada.

Paita ninyo uy. Bisto nang inyong baraha Do!

* * *

Ang atong mga opisyal sa dakbayan nanguros dihang human na sila maigo sa kilat.

Ang buot nako ipasabot nga karon na hinoon nga nagsugod na ang tinguwan karon pa sila mihimo og lakang nga maatiman ang atong mga drainage system.

Pastilan. Pagkataas sa panahon nga ting-init nganong wala man g’yud ninyo kini buhata. Daw nangatulog ang atong mga opisyal atul sa maong higayon ug karon nahigmata na sila dihang mibunok ang kusog nga uwan.

Paita ninyo uy!