Ang lakang ni Kongresista Tomas Osmeña sa pagpiit sa Commission on Audit nga moeksamin sa mga libro sa kinitaan sa mga pribadong tulunghaan ug tambalanan usa ka dalaygon nga lakang.
Kini tungod kay ang pag-ingon nga dili negosyo ang maong mga institusyon puwes dili sila mobuhis sa gobyerno, usa ka panlinglang .
Kay ang tinuod kundili pa negosyo, dili sila mositar sa kantidad nga angay ibayad sa mag-eskuyla o kaha sa magpatambal.
Sama sa mga relihiyon, nga sa pag-amot o paghalad (terminolohiyang gigamit sa Ginoo diha sa Biblia) wala tokahi ang matag miembro kun pilay ihulog sa puntil isip halad niya sa iyang pagsimba base sa gisugo sa Ginoo nga nag-ingon, " kay gihiguma ko ang mohatag nga malipayon", busa kun kalipay nimo ang paghalad og peso, mahimo kaayo, walay Ginoo o mga kadagkoan sa simbahan nga mosaway.
Hinuon kun aduna may relihiyon nga mositar sa kantidad nga iyang ihalad sa iyang pagsimba, o kaha maningil og bayad sa minatay nga pa-ampoan o kaha sa batang bunyagan, ang mga kadagkoan na sa gobyerno ang angay mo-define niana, klase ba kana sa negosyo o dili.
Apan sa bahin sa mga pribadong eskuylahan ug hospital, asa kahang dapita ikasulti nila nga wala sila magpaginansya sa ilang mga serbisyo.
Busa kun ang tanang opisyal sa gobyerno pareho pa lang ka segurista kang Kongresista Osmeña, dili maka-eskapo ang mga eskuylahan ug tambalanan karon sa dakbayan sa Sugbo gikan sa ilang dakong responsibilidad sa pagbayad og hustong buhis ngadto sa gobiyerno.