Tug-ani mi kun kinsa

Ang bag-ong regional direktor sa Philippine Drug Enforcement Agency (PDEA) miingon nga wala pa kuno siya’y nasayran nga dunay iyang sakop nga nalambigit pagdawat og suborno gikan sa ilang mga dakponon.

Apan gidasig ni Adrian Alvariño ang publiko nga kun duna sila’y nasayran nga iyang mga sakop nga nagbinuang, hatagan siya og impormasyon aron iyang mahimoan og aksyon.

Na hala, kun kamo diha dunay nasayran pahibaw-a ninyo si Sir Adrian aron masuta kun tinuod ba nga aksyonan niya ang inyong report. Pero mas nindot og klaruhon ninyo ang inyong report.

Sa wala pa gud madistino si Sir Adrian dinhi sa Central Visayas, dunay pipila ka PDEA agent nga giingong nakigkonsabo na hinuon sa mga tawo nga nalambigit sa negosyo sa illegal nga drugas.

Resulta, mikalit lang og kaadunahan ang maong mga agents sigun sa akong tinubdan nga mga higala ra usab nako diha sa PDEA.

Ang uban kanila, sigun sa report, daghan na og mga sakyanan. Nasayud ko nga makaila mo kun kinsa sa inyong mga kauban ang mokalit lang og kaadunahan uy, kauban gud mo.

Sigurado man g’yud ko nga kining mga tawo nga nalambigit sa pagpamaligya og shabu ang uban ani moduol man g’yud sa mga mananakop.

* * *

Nasubo kaayo ko sa gitug-an sa akong higala nga agent kaniadto sa PDEA, ambut kun naa pa ba kaha karon.

Wala man sila’y sweldo. Giangkon kagahapon ni Sir Adrian nga wala sila’y intelligence funds nga posibleng ihatag sa ilang mga assets. Mao nga ang ilang assets kun mokuyog sa raid, aw unsa pa.

Mamunit sila og bisan unsa nga ilang makit-an sa balay nga ilang rondahon. Kini maoy angay’ng bantayan pag-ayo nimo Sir Adrian kay usa kini sa makadaut sa dungog sa grupo.

Sama ra gud sa Narcom kaniadto nga daw una sa ginamos ang kabaho. Diha pa gani’y agent nga si “RI” nga nadakpan g’yud sa laing mga tropa nga nalambigit diay sa pagpayuhot og shabu.

* * *

Wala g’yuy mahimo ang PDEA sa kabalaka sa uban nga dunay mga tawo nga mga druglord, drug users nga mapili sa katungdanan sa barangay atol sa umaabot nga eleksyon. 

Una, gideklarar sa Supreme Court nga illegal kun pugson ang mga kandidato nga magpa-drug test isip kabahin sa pagdawat kanila isip kandidato sa usa ka elective position.

Husto si Adrian nga ang katawhan sa usa ka barangay makaila kun kinsa ang mga nagpapili sa ilang dapit. Kun kini druglord o kaha pusher, aw naa ra kanila kun kini ba ang gusto nila nga modumala sa ilang barangay.

Sama ra kun ang usa ka rebelde magpapili sa mga elective positions, aw ang mga tawo ra ang magbuot.

* * *

Ang Task Force Alpha (TFA) sa Land Transportation Office magsaulog karong Biyernes sa ika-napulo na ka tuig gikan sa iyang pagkamugna.

Gipahibalo ko sa mga opisyal sa TFA nga hapit na sila mobalik sa pagserbisyo.

Higpitan na g’yud pag-ayo ang pagpili kinsa kadtong paapilon sa operation nga maoy mangisyu og mga T-O-P ngadto sa mga madakpan nga drayber.

Kana, suporta kaayo ko. Karon lang pwerteng daghana g’yud nga mga drayber nga abusado. Dunay pasangil nga dunay mga deputized agent sa LTO nga mangilkil o modawat og suborno.

Kun mahitabo kini sa higayon nga mobalik na ang TFA sa pag-operate, ayaw kataha pag-report nako kay pakit-on ko kamo unsay akong buhaton.