Wala magdahom ang kadaghanan nga luyo sa ka-estrikto ni Kongresista Tomas Osmeña kinsa mayor kaniadto sa dakbayan sa Sugbo may mga opisyal pa sa barangay nga makahimo og surambaw sa mga proyekto sa barangay.
Ang mga katawhan usab sa barangay nalipay kay nagtuo sila nga dili makahimo sa pagpangurakot ang ilang kapitan sa pagtuo nga nagkingking kini gumikan sa kahigpit ni Osmeña.
Apan sa dayon nang biya ni Osmeña sa pagka-mayor kay midaog siya sa pagka-kongresista sa habagatang distrito sa dakbayan sa Sugbo, nadiskobrehan niini nga nagsindikato ang iyang mga kapitan sa barangay.
Gani gumikan sa kapungot ni Osmeña nga giluiban diay siya sa iyang mga sinaligan sa barangay, iyang gipabati sa tanan nga mas ganahan siya nga mobiyahe si Kapitan Eugenio Faelnar sa Guadalupe ngadto sa Africa nga dili na mobalik sa Sugbo.
Didto ra ba sa Africa tua ang tanang mangtas nga matang sa mananap nga mokaon og tawo, mao ba kahay buot ipasabot ni Kongresista Tommy nga molamoy kang Faelnar aron dili na makabalik dinhi sa dakbayan.
Unya gawas kang Faelnar , may tulo pa ka laing kapitan sa barangay nga giawhag niyang dili na pabutohan sa katawhan karong Oktuber 25.
Kini mao ang kapitan sa barangay Inayawan, Kalunasan ug Suba.
Ambot lang kaha sa katawhan, kung mosanong ba sila sa awhag ni Kongresista Tommy kinsa gibati og hilabihang kapikal sa mga kapitan nga nagbinuang sa mga proyekto sa barangay.
Niining panahon ni Mayor Mike Rama, wala kahay mga kapitan nga nagplano nang manurambaw sa mga proyekto sa barangay ilabi na nga nakita nila nga mas lumoy og kinaiya si Mike kay kang Tommy?