Bokal Arleigh Sitoy

Ang pansayan, chicharon ug sex enhancer Makalingaw karon ang hunta probinsiyal sa lalawigan sa Sugbo tungod ni Bokal Arleigh Sitoy. Tungod sa mga resolution nga gipangsang-at sa bokal medyo natutokan ug napansin na sa mga Sugboanon ang hunta probinsiyal. Sukad magsugod sa ilang katungdanan isip mga lokal nga magbabalaud sa lalawigan, si Bokal Arleigh Sitoy pa ang nakapalabang og mga talagsaong resolution.

Una, gipalabang sa bokal ang resolution nga nagmando sa mga buhatan ma pribado man o publiko sa pagbutang og lahi nga pansayan alang sa mga bayot ug tomboy. Seguro nakasunod si Bokal Sitoy og bayot ug tomboy nga migamit sa pansayan ug kay siya nalangay, pahimoan na lamang kini niya og ilang kaugalingon. Dugay man ugod ning bayot kun mogamit og pansayan kay manangtang pa sa daghang higot sa ilang tumoy.

Ikaduha, gipalabang ni bokal ang resolution nga nagmando sa mga mamuhatay og chicharon nga pabutangan og mga nutritional facts ang putos sa mga chicharon. Gawas sa nutritional facts, pabutangan usab sa bokal og warning nga piligro sa panglawas ang chicharon tungod kay daghan kini og tambok. Ang bokal naaghat sa pagpalabang sa nahisgutang resolution tungod kay iyang nahinumdoman nga chicharon ang iyang gikaon sa dihang giataki siya sa iyang sakit. Boot lang segurong manimalos si bokal sa chicharon.

Ug ang ikatulo mao ang resolution nga nag-awhag sa mga botika sa dili pagbaligya og mga sex stimulants o sex enhancers kon walay resita gikan sa doktor ug kun walay pagtugot gikan sa mga asawa. Rason sa bokal aron dili na manglimbong ngadto sa asawa ang iyang bana.

Ang pansayan, chicharon ug sex stimulants o sex enhancers nga resolution ni Bokal Arleigh Sitoy medyo kataw-anan apan aduna kini punto legal nga implikasyon. Sama sa chicharon ug sex enhancers nga maingon tang class legislation ug kay class legislation dili kini legal.

Sa kadaghan dihang makadaot sa panglawas kun palabian ma pagkaon man o mainom nganong ang putos ra man gyod sa chicharon ang pabotangan og nutritional facts ug warning ni Bokal Sitoy? Kay mao ni ang iyang gipasanginlan nga hinungdan nga giataki siya sa iyang sakit? Unsa man ning imo Bokal Sitoy panimalos sa chicharon kay giataki ka sa imong sakit dihang imo siyang gikaon?

Papananghiron na ni Bokal Sitoy sa asawa ang iyang bana kun ugaling mopalit kini og sex enhancer aron dili na makahimo sa paglimbong kaniya. Kay ngano, ang mga bana ra ba diay ang kamaong manglimbong sa iyang bana? Dili ba daghan man usab nga asawa ang naglimbong sa iyang bana? Wa kay plano bokal nga did-an usab sa pagpalit og sex enhancers ang mga asawa?