Hilas
Wa gyu’y nahimo ang suwat ni Presidente Noynoy Aquino aron dawaton sa Mactan Cebu International Airport Authority board si city planning and development officer Nigel Paul Villarete isip bag-ong general manager sa tugpahanan.
Niadtong miaging semana nagtagbo sa unang higayon ang mga sakop sa board uban na sa bag-ong mga miyembro niini. Apan iskandalo maoy nipatigbabaw atol sa maong tigum.
Una, ang dugay ra untang angayang hulipan nga si Danilo Augusto Francia maoy nilingkod isip presiding officer sa board.
Kini bisan pa sa presinsiya ni DOTC Undersecretary Aristotle Batuhan isip representante ni Secretary Jose De Jesus.
Ubos sa charter sa MCIAA ang DOTC secretary maoy tsirman niini busa maoy angayang mo-preside sa tigom. Sanglit si Batuhan man maoy gitudlo nga opisyal nga representante ni De Jesus siya unta ang angayang nilingkod isip presiding officer atol sa tigom niadtong Huwebes.
Apan ang nahitabo gitugotan man tinuod nga makatambong sa tigom si Batuhan apan isip usa lang ka observer.
Ikaduha, wala tuki-a sa board ang pagtudlo sa mosunod nga general manager. Unsaon nga ang nilingkod nga presiding officer si Francia man nga klarong dili ganahan mokanaog sa iyang pwesto.
Bisan sa suwat ni Presidente Aquino nga buot niyang si Villarete maoy mohulip ni Francia apan ang mga sakop sa board miingon nga kinahanglan una nga iduso sa committee on good governance nga gipangulohan sa bag-ong miyembro gikan sa private sector nga si Francis Monera.
Matud ni Francia nga kinahanglan kunong hashasan og maayo ang pagpili sa mohulip kaniya aron masiguro nga qualified kini sa pwesto.
Kun duna may labing hilas wa nay makalupig ni Francia. Ti-aw mo bay maghilas-hilas siya sa pag-ingon nga kinahanglang hashasan og maayo ang mohulip niya aron kuno pagsiguro nga qualified.
Wala siya kuyapi? Wala gyud siya’y nawong nga mosulti niini tungod kay kun duna may dili qualified nga mohupot sa pwesto way lain kun dili siya.
Dugay ra siyang angayang tangtangon tungod kay wa siya’y CESO illegibility nga maoy requirement sa Civil Service Commission alang sa iyang katungdanan.
Unya karon maghisgot siya nga angayang hashasan og maayo aron masiguro nga qualified ang mohulip niya? Dili tantong baga og nawong!
* * *
- Latest
- Trending
