Gusto diay mo'g ikiha g'yud?

Wala pa gayud mokibo ang mga tinugyanan sa Sikatuna Security Agency sa reklamo sa ilang mga gwardya nga gikolektahan nila og SSS contribution apan wala nila i-remit sa Social Security System.

Gusto na gayud sa maong mga gwardya nga mopasaka og reklamo mao nga kining ako, paghatag lang gayud unta og higayon sa tagdumala niining maong security agency nga makorehean ang ilang sayop.

Pait baya kaayo ning mag-atubang kita og kaso mao nga akong giawhag ang mga gwardya nga iangan-angan lang usa ang paghimo og lakang-legal sa ilang ahensya.

Apan sila si security guard Raymund E. Subingsubing ug Heriberto Villarta halos dili na makaagwanta.

Gipakita ko nila sa certification sa SSS nga nagpakita nga ang ilang ahensya wala gayud mo-remit sa ilang SSS contribution nga gikolekta gikan kanila ug sa uban pang mga gwardya.

Maayo unta kadto og usa, duha o tulo ka buwan lang ba nga “delay” apan nagpakita nga sa tuig 2008 ang buwan ra sa Oktobre ug Disyembre ang dunay remittance si Subingsubing.

Sa tuig 2009 wala g’yuy remittance bisan usa ka sentimo. Duha ka buwan ang remittance ni Subingsubing nga unta matud pa sa gwardya motulo na man siya ka tuig nga giibanan og SSS contribution. Ang rekord sa SSS nagpakita usab nga si Villarta wala usa’y contribution sa SSS bisan og dugay na siya nga nahimong sakop sa Sikatuna Security Agency ug sa matag sweldo ibanan g’yud siya og para sa SSS contribution.

Nahibaw-an nako nga tag P266 ang giiban sa ilang ahensya sa sweldo sa maong mga gwardya matag buwan.

Kamong ubang gwardya sa maong ahensya, tan-awa kuno palihug ang inyong rekord sa SSS. Aw bisan kadtong mga gwardya sa laing ahensya, himoa ninyo ang sama nga lakang.

* * *

Dunay usa ka regional director sa usa ka national government agency dinhi sa Sugbo nga akong gidayeg kay siya mismo ang mihimo og lakang nga masulbad ang binuang sa iyang opisina.

Kanindot. Kun ingon niini ang tanang regional direktor sa mga ahensyang nasudnon, aw bisan unsa nga buhatan sa kagamhanan, sigurado nga mapakgang ang mga binuang.

Paabota ninyo mga magbabasa sa akong lindog ang exclusive na usab nato nga investigative report sa binuang sa mga kawani mismo niining ahensya nga sikat kaayo sa publiko.

Dili lang usa nako ibutyag kun unsa kini nga ahensya aron dili makabantay ang mga badlongong kawani sa kagamhanan.

* * *

Malipay g’yud kaayo ko kun makabalik na ang mga sakop sa Task Force Alpha sa pag-operate batok sa mga abusadong drayber.

Gitug-anan ko nga mora’g gamay na lang kaayo ang kuwang nga mahitsas na ang mga papeles nga pirmahan mismo sa hepe sa Land Transportation Office.

Daghan kaayong mga abusado nga drayber. Kagahapon, abi nako og nganong nabara ang dagan sa mga sakyanan didto sa tungod sa Department of Social Welfare and Development (DSWD) sa General Maxilum Avenue.

Duna diay kotse nga mi-U-turn sa karsada nga wala itugot ang U-turn. Ang TFA gud kun maoy manakop, walay daghang sulti-sulti, isyu dayon og Temporary Operators Permit.

Ang uban gud diha, sama sa pipila ka sakop sa CITOM, makasaway ko kay adto pa ang enforcer sa layo magsuwat-suwat kunohay, unya duolon dayon sa drayber. Ngano man g’yud nga molakaw pa man?

Unya, dunay drayber nga tugotan lang nila nga molarga nga wala pa maisyuhi og TOP, aw gibilin hinoon ang lisensya. Apan pagbalik sa drayber, giuli ang lisensya, pastilan.