Ninggawas na gayod ang itom nga hangin sa road concreting project sa kada barangay sa dakbayan sa Sugbo nga wa gayod makonkreto. Tungod sa maong proyekto miaslom karon ang relasyon sa sood nga managhigala nga sila si Kongresista Tomas Osmeña ug konsehal Jingjing Faelnar.
Gipasanginlan ni Kongresista Tomas Osmeña si ABC president ug konsehal Jingjing Faelnar nga mipabor ngadto sa usa ka kontraktor nga dugay na nilang gidid-an sa pag-apil sa mga proyekto nga iya sa dakbayan tungod kay dili kini maayo nga motrabaho. Ang pamahayag sa kanhi mayor ug kasamtangang kongresista sa ikaduhang distrito sa dakbayan sa Sugbo gisuportahan nila ni kanhi ABC Vice President ug karon konsehal Sisinio Andales ug T.Padilla Barangay Captain Michael Ralota.
Agi og pagpamatuod ang duha ka opisyal sa ABC mihimo og pinanumpaang pamahayag nga nagsaysay sa ilang kasayoran nga kaniadtong tuig 2006-2007 nagpalabang sila og resolusyon nga nagban ug nagdili sa kontrobersyal nga kontraktor sa pagsalmot sa mga proyekto nga pasiugdahan.
Apan kining maong pangangkon gikataw-an lamang ni Jingjing Faelnar kay matud pa niya wa sila niining gihisgutang resolusyon. Hinuon iyang gipakita ang resolusyon nga giaprobahan sa mga sakop sa ABC board pinaagi sa indorsement ni Kapitan Michael Ralota nga nag akredit sa kontrobersyal nga kontraktor kauban ang lain pang 17. Pero gibarogan gayod ni konsehal Sisinio Andales ang iyang gipanumpaan nga pamahayag.
Apan lima ka mga sakop sa ABC board ang miingon nga wa sila makahinumdom sa resolusyon nga gipanghambog ni Andales ug Ralota ngadto kang Kongresista Tomas Osmeña. Si Andales ug Ralota dili makapakita og dokumento sa resolusyon nga ilang giingon nga nagdili sa kontraktor sa pag-apil sa mga kontrata nga iya sa mga barangay sa dakbayan pero makapakita ug gani makapakopya ka pa sa resolusyon.
Kinsa kaha ang bakakon ug ang namakak ning kontrobersiyal nga proyekto. Si Jingjing kaha o sila si Atty. Sisinio Andales?
Nganong karon pa man motingog si Kongresista Tomas Osmeña sa mga proyekto nga gihimo sa kontraktor nga dili maayo nga motrabaho? Ang nahisgutang kontrobersiyal mao na kaha kini ang makaputol sa sumpay og tina-e nga si Tomas ug Jingjing? Tininood kaha ning bangi sa duha o kabahin lamang kini sa drama nga sila lang duha ang nasayod. Abangan.