Angay ba'ng i-legalize?

Gusto ba kamo nga ma-legalize ang masiao? Sama sa derby nga dunay permit sa local government unit, unsa kaha kun i-legalize na lamang ang masiao aron sa ingon makasapi usab ang gobiyerno?

Kini nga isyu mitumaw human nga gipasaka ni Cavite Representative Elpidio Barzaga Jr. ang House Bill 3289 nga nag-legalize sa sugal nga jueteng. Hinuon walay jueteng dinhi sa Central Visayas. Tua ra kini nag-operate sa Metro Manila ug kadaghanang probinsiya sa Luzon.

Gusto ni Bargaza nga ma-legalize ang jueteng aron sa ingon makakuwarta usab ang kagamhanan sa operasyon niini. Alang kaniya, kun legal na ang operasyon sa maong sugal, daghan unya ang makabenepisyo niini, ilabina niadtong mga runner sa jueteng.

Hinuon bisan kun walay jueteng dinhi sa Sugbo, laganap gihapon ang sugal nga masiao. Ug hilom kining nag-operate sa kalungsoran aron paglikay sa mga mata sa balaod.

Tungod niining sugyot sa usa ka magbabalaod nga i-legalize na lamang ang jueteng, adunay mga panawagan nga i-legalize usab ang masiao dinhi sa probinsiya. Kini gumikan sa rason nga makatabang kini sa katawhan, ilabina sa mga kabus.

Kun buot sabton, mahimong makakuwarta usab ang mga LGUs sa legalisasyon sa masiao. Kini sa rason nga magdawatan na man usab ang mga LGUs og buhis gikan sa kita sa maong sugal.

Apan daghan ang mipiyait sa maong sugyot. Dili kuno angay i-legalize ang masiao tungod kay makadaot kini sa moralidad sa katawhan tungod kay usa man kini ka sugal.

Usa pa, daghan ang nahadlok nga mao usab unya kini ang hinungdan ngano nga mograbe ang corruption.

Gani tulo ka kongresista ang mipakita na’g pagsupak sa unsa mang sugyot pag-legalize sa masiao. Sila si Cebu City south district Rep. Tomas Osmeña, Cebu fourth district Rep. Benhur Salimbangon ug fifth district Rep. Ramon “Red” Durano walay nakitang kaayohan sa legalisasyon sa maong sugal.

Mosamot hinuon, matud nila, ang sitwasyon sa katawhan kun i-legalize ang masiao. Kun silay pangutan-on, bisan kun himoon kining legal, sugal gihapon kini ug angay nga isalikway sa katawhan.            

Apan sa ako nang gipangutana, unsa kaha kun i-legalize na lamang sa kagamhanan ang masiao? Mosaler kaha kini? Ug unsa ang garantiya nga makasapi ang kagamhanan niini?

Dili ikalimod nga walay dag-anan ang lotto, swertres ug uban pang legal nga sugal sa masiao ug jueteng. Sa masiao ug jueteng, gamay lamang ang itaya apan dako usab ang tsansa sa pagdaug.

Sa lotto ug sa uban pang legal nga sugal, dako ang imong itaya apan layo ra sa tinuod ang tsansa sa pagdaug. Kini usab ang rason ngano nga mas pilion sa mga sugarol ang masiao o jueteng.

Angay gayud nga timbang-timbangon sa gobiyerno kun ikaayo ba ang pag-legalize sa masiao. Angay usab hunahunaon niini kun unsay dag-anan sa lotto sa higayon nga mahimo nang legal ang masiao ug jueteng.

Hinuon sa akong pangagpas, mayoridad sa katawhan uyon gayud sa pag-legalize sa masiao ug jueteng. Duol sa ilang dughan kining maong mga ilegal nga sugal tungod kay dili kaayo kini bug-at sa ilang bulsa.

* * *

Email: [email protected]