Mabuhi ang Cebu Media!

Sagol kalipay ug kamingaw ang akong bation matag buwan sa Septiyembre diin saulugon ang “Broadcasters’ Month” ug ang “Press Freedom Week” sa Cebu media.

Tungod tingali kay 48 ka tuig man ang akong nagahin sa pag-alagad sa radyo ug telebisyon. Nagsugod ako sa 1961, isip announcer sa radyo DYBC unya nahimong komentarista sa nagkalainlaing estasyonan sa radyo sa Sugbo. Nag-alagad isip station manager sa DYDY (Banahaw Broadcasting Corporation) ug Bombo Radyo. Newscaster usab ako sa telebisyon sa ABS-CBN ug RPN9. Karon, anchor sa CCTN Channel 47 ug nagsulat og regular column ning maong pamantalaan.

Nakaila ug nasuod nako ang mga dagkung haligi sa Cebu media, labi na sa among pagbisita sa Singapore niadtong tuig 1987 ug 1989 sa imbitasyon ni Ambassador Frank Benedicto.

Garbo kaayo nako nga nakauban sila si Nito Jabat, publisher sa The Freeman, Cheking Seares, editor-in-chief sa Sun-Star; Jerry Tundag, editor-in-chief sa The Freeman ug Godo Roperos, maglilindog sa Sun-Star ug Manila Times.

Nakauban usab nako sa maong biyahe sila si Maning Satorre sa Sun-Star; Bobit Avila sa The Freeman ug Philippine Star; Ben Ypil sa The Freeman; ug Sam Costanilla sa Sun-Star.

Mingawon usab ako sa mga respitado ug mga beterano sa media nga akong kauban sa hudyaka ug katawa didto sa Singapore nga nitaliwan na sa laing kinabuhi. Sila mao si Henry Redula, manager sa Philippine News Agency; Boy Veloso, columnist sa Sun-Star, Dodo Embrado, senior reporter sa The Freeman ug si Maning Oyson, sports editor sa Sun-Star.

Nitaliwan na usab sa laing kalibutan ang akong mga kahugoy-hugoy sa broadcast industry nga sila si Press Secretary Cerge Remonde, Inday Nita Cortes Daluz, Larry Abelgas, Nash Aliño, Romy Sta. Cruz, Migs Enriquez, Amading Abad, Rudy Ylaya, Ely Amante, Rudy Ramos, Meonik Mendoza, Alex Pepito, Franco Chavez, Glo Ilumba, Cedric Tumulak, Emil Rizada, Vic Abangan, Nonoy Villanueva, Gary Bacolod, Ambrosio Iyas, Vic Villordon,   Roger Solante, Raul Araneta, Vic Alcano, Ricky Yap, Tinong Pujida ug ang nagtudlo kanako og tv newscasting, kanhi ABS-CBN manager Jess Vestil.

Dili usab nako hikalimtan sila si Pete Calomarde, Peary Aleonar, Joe Logarta, S.D. Tecson, Talyux Bacalso, Siux Cabase, Ben “Iyo Carpo” Zubiri, Baby Camomot, Johnny Brennan, Doroy Mongaya, Abe Licayan, Danny Gonzales, Marcial Sanson, Angel Libre ug Gerino “Big Boss” Pancito (tag-iya sa DYDR radio). 

Wala na ako masayud kun hain na karon ang akong mga higala nga sila si Danny Desierto, Al Buenaventura, Gennie Vamenta, Chita Durano, Lou Arevalo, June Kintanar, Lee Kintanar, Al Alinsug, Vito Minoria, Tony Vestil, Tinoy Paulin, Gem Alvez, Frankie Abao, Dennis Cabalfin, Harry Gasser, Ricky Torres, Dodie Roz, Bobby Amor ug Jun Pancito (U.S?).

Sila, ug ang uban nga wala nako mahinganli dinhi, maoy nakigbisug pagpatunhay sa press freedom dinhi sa Sugbo nga gilugpitan didto sa Manila ug ubang dapit sa nasud panahon sa martial law.

* * *

Nindot kaayong tan-awon ang mga sakop sa Cebu media nga naghiusa sa pagsaulog sa ilang kagawasan.

Aduna usay nagkalainlaing forum alang sa pagdugang sa kahibalo sa mga sakop sa media kalabut sa ilang propesyon.

Ipadaplin gayud nila ang “rating game” ug panagribal sa paghatud sa mga balita kun hulgaon na ang media sa abusadong mga tawo.

Mao kini ang katarungan nganong wala gayud mahudlat ang Cebu media bisan sa panahon sa diktadoriya.

* * *

Kumusta na man diay ang Cebu Tri-Media Association (CTMA) ug ang Sugbuanong Komentaristang Nagpakabana (SUKNA)? 

Nahimo man gud akong presidente sa CTMA human sa unang nangulo niini nga si Al Alinsug, publisher sa Cebu Times. Ako usab ang naghatag og ngalan sa SUKNA.

Among gimatuto ug gipalambo ang CTMA aron maoy kapasilungan sa mga sakop sa media sa wala pa i-prokalamar hangtud gideklarar unya gilibkas ang martial law sa nasud.

Ang SUKNA gitukod sa pito lamang ka mga komentarista sa radyo. Convenor og dili presidente ang nangulo sa maong kahugpungan kaniadto..

Ang SUKNA ang unang nikiha sa mga cabinet members ni Pres. Cory Aquino tungod sa pagpugos nila sa mga Sugbuanon paggamit sa pinulungang Tagalog sa mga tunghaan nga mao kuno ang national language. Si Atty. Adelino Sitoy mao ang among manlalaban niadto. 

Diha kadtoy laing media organization nga gitukod ni Atty. Vito Minora nga gitawag og Mass Media Association of Cebu, Ltd. (MAMOCEL) apan nahanaw kini daw aso. Subo usab ang nahitabo sa Cebu Press Club.

Ako nanghinaut nga ayuhon pagdala sa mga namunuan karon ang maong mga media organizations aron makahatag kini’g kaayuhan sa mga tinuod nga sakop sa media inay gamiton kini sa pagpanapi sa mga walay medium kun komedia.

* * *

Email:[email protected]