"Fake son defender"
Tungod sa labihan niyang pagmahal sa iyang sinagop nahimong sentro si Mayor Socrates Fernandez sa dakbayan sa Talisay sa mga bati nga kumentaryo sa radyo, sa mga maglilindog sa mantalaan ug bisan na sa mga social networking sites sama sa Facebook ug uban pa.
Labing awahing paghulagway niya sa mga tawo mao nga na-convert na ang iyang maayong pagkatawo gikan sa unang pagkaila sa publiko kaniya sa wala pa siya mosulod sa politika ngadto sa dili maayong imahin karon tungod sa iyang labihan nga pagkunsintir sa iyang sinagop nga si Joavan.
Gikan sa iyang pagka “Catholic Faith Defender” si Mayor Fernandez karon gihulagway na sa uban nga “Fake Son Defender.” Kun nawagtangan man sa ilang respito ug pagsalig ang publiko kaniya, way laing mabasol kun dili ang iyang kaugalingon.
Unsaon man gud nga wala man niya madawat ang kamatuoran nga kinahanglan na gyud nga ipaubos sa drug rehabilitation ang iyang anak. Dugay ra ang mga sugyot nga iya ning himuon, gani bisan ang iyang padrino sa politika nga si Kongresista Eduardo Gullas miawhag na niya kaniadto sa pagpaubos kang Joavan sa rehabilitation.
Apan nagpakabuta-bungol siya sa maong sugyot. Kun dili man siya makaako nga magsud-ong sa iyang anak nga mopaubos sa rehabilitation ang maayo niyang buhaton mao nga pitulon o ba kaha bantayan ang iyang sinagop nga dili makamugna og purhisyo sa laing tawo.
Nabalaka ko nga dunay mas grabi pa nga mabuhat si Joavan kay sa mga pasangil sa pagpani-on og pusil ug pagpanghasi kun dili molihok si Mayor Soc karon.
Dili pa kaniadto ang atong madunggan nga si Joavan tiggamit lang og drugas, apan tungod kay way pagpakabana ang iyang amahan karon nabaniog na nga siya dili lang user kun dili pusher gyud.
Kun tinuod ang pasangil sa kanhi bata-bata ni Joavan nga si Guillerma Barrido nga si Joavan namaligya og drugas unsa man kahay sunod niyang pwede pang buhaton? Maayong bukhon ni Mayor Soc ang iyang mga mata sa kamatuoran nga posibleng tinuod ang pasangil ni Guillerma inay nga iya lang gihapon nga tapin-an si Joavan.
Kun nituo pa dayon si Soc sa mga report niadto nga mogamit ang iyang anak og drugas dili na unta tingali moabot sa punto nga mapasanginlan siyang namaligya og drugas.
Inay iyang isalikway ang pasangil ug hinganlan nga bakakon ang namasangil maayo tingaling bantayan ni Soc si Joavan matag higayon nga moadto ni sa iyang balay alampuanan tungod kay matud ni Barrido gigamit na ning “hideout” ni Joavan.
Ang nakadaut kay gawas nga gihimo nilang hideout adto pa gyud sila maghingos ug magputos sa ilang baligya nga shabu. Seryoso ang pasangil nga nagkinahanglan og seryoso nga aksiyon gikan sa usa ka but-an ug mahadlokon sa Diyos nga amahan.
Kun tinud-anay si Soc nga mahadlokon sa Diyos, ipakita kini pinaagi sa pagputol sa kabadlongon sa imong sinagop.
* * *
- Latest
- Trending
