Ang maabtikong pagdumala sa gipiyal kanato sa Dios

Pamalandong matag domingo

Ang agrikultura kaniadto maoy sentro sa ekonomikanhong basehanan sa usa ka katilingban ug sa ekonomikanhong pagkinabuhi. Dili kini pangutana kun kinsa ang daghan og salapi o kinsa ang adunahan o kabus. Ang pangutana nagpunting kun si kinsa ang dunay gahom sa pagdumala o pagkontrolar sa agrikulturanhong abot o si kinsa ang makakuha sa ginansiya gikan sa maong abot. Ang tag-iya adunay piniyalan nga maoy modumala sa yuta ingon man sa abot sa maong tag-iya. Siya ang makig-areglo sa mga mangutangay ngadto sa iyang amo. Gitin-aw sa atong ebanghelyo karon, nga ang mga nakautang ngadto sa Tag-iya ang nakautang sa abot gikan sa iyang yuta.

Ning panahona karon, gikinahanglan ang sentido komon diha sa pagdumala sa bisan unsang gipiyal kanato. Usahay ang mga anak sa kahayag ang dili maantigong modumala sa bisan unsang butang kalibutanon. Nga sa ato pa, wala sila’y hunahuna sa usa ka magpapatigayon. Mao nga daghan ang nahimong alkanse kaayo diha sa ilang pagdumala sa ilang kinabuhi. Malumo unta sila apan dili maantigong mopasikot-sikot sa panahon sa kalisud. Bisan pa man kun ang salapi dili maoy lintunganay sa tanan, apan dili ikalimod nga dili pud kita makalihok kun wala ang salapi. Mao nga maayong gamiton ang salapi, aron makaginansiya dili lang laing salapi kondili makaginansiya og maayong resulta sa usa ka programa nga gibuhian nato og puhonan.

Diha sa atong paggasto ingon nga parokya o simbahan, ato unang hunahunaon kun gikinahanglan ba gyud ang paghikay taman sa ginhawa alang sa usa ka kasaulogan hangtod nga wala na hinuon kita’y magamit labina kun motumaw ang mas balidong panginahanglan?