Nagmaoy nga mga senador

Sa talagsaong higayon, ang media ang nahimong unod sa balita dihang niatubang sa senado ang mga kadagkuan sa broadcast network sa nasud. Sakto ka—ang hostage fiasco nga nahitabo sa kaulohan niadtong Agosto 23 ang hinungdan nganong gipatawag sa mga senador ang mga sakop sa media. Sakto ‘sab ka—ang media ang gipasanginlan sa pipila ka senador nga maoy hinungdan nganong nabulingbulingan ang dagway sa atong nasud sa tibuok kalibutan. Sakto ‘sab ka—daghang mga tiguwang nga senador nga wa’ makatugkad sa kamahinungdanon sa pagbutyag sa balita sa bisan asang bahin sa kalibutan.

Nagtuo ko nga igo lang sa pagsusi ang mga senador unsa ang mga kasaypanan nga nahimo sa broadcast media atol sa kapin siyam ka oras nga ‘live coverage’ sa hostage drama nga nahitabo sa Quirino Grandstand. Apan sa dagan sa pangutana nilang Senador Joker Arroyo ug Senate President Juan Ponce Enrile, nahu’g nga bakikaw ang nitumaw nga diskusyon. Gikwesyon sa tinahod nga mga senador nganong nahimo sa local media ang pag-report sa mga dagkong international media kabahin sa kulbahinam nga panghitabo atol sa hostage crisis. Sa kaulahian matod nila, naghatud ni og dakong uwaw sa atong nasud.

Bisan ang lindog sa pangu’ sa ABS-CBN News and Current Affairs nga si Maria Ressa sa mantalaang ‘Wall Street Journal’, giinitan sa mga senador. Giingong pagpakauwaw ang maong lindog sa dungog sa nasud. Kanus-a ba nahimong pagpakauwaw ang pagtug-an sa mga nahitabo ug paghatag sa imong obserbasyon sa mga kapakyasan ug kapalpakan sa gobyerno. Ang pagpadayag sa impormasyon ug opinyon sa usa ka tawo, mao ang labing mahinungdanong punto sa usa ka demokratikanhong nasud. Ang si bisan kinsa nga mo-kwestyon o mohagit sa maong katungod, wa’y kalainan sa usa ka diktador nga buot huptan ug sumpuon ang katungod sa ubang tawo.

Sa proseso sa diskusyon, ingon og wa’y kalainan sa pagkutlo sa kagawasan sa pamahayag ang gihimong pag-gisa sa mga opisyal ngadto sa mga representante sa dagkong broadcast company. Nahimong sentro sa pagdungog ang pakig-ambit sa mga lokal nga kompaniya sa media sa impormasyon ngadto sa mga dagko ug international media outfit. Kun si Senador Joker Arroyo ang paminawon, iyang gikwesyon ang alang niya pagpakauwaw sa nasud tungod kay nahatagan og da’n ang international media sa pag-cover sa mga panghitabo dinhi sa Pilipinas.

Nakalimot siguro ang senador nga adunay kapin 10 milyones ka mga Pilipino sa tibuok kalibutan nga nagpaabot og balita gikan sa ilang yutang natawhan? Unsa may buot mahitabo sa mga senador, itago sa kalibutan ang mga panghitabo sa atong nasud? Kung mahitabo ni, wa’ tay kalainan sa Afghanistan nga nasayod nalang ‘ta sa wa’y puangod nga pagsilot sa ilang mga tawo, pagtamak sa tawhanong katungod ug pag-guba sa ilang gobyerno, human masudli sa international media. Angayan hinumduman nga ang nahitabong hostage crisis sa nasud, nahitabo ‘sab sa ubang bahin sa kalibutan ug bisan sa mga adunahan ug mga kompleto sa kahimanan nga mga nasud sa pagsagang sa susamang krisis.

Ang nahitabong hostage crisis sa miaging buwan ang nagsukod sa katakos sa halos sa tanang sektor sa atong katilingban. Gisusi sa maong insidente unsa ka andam ang otoridad sa malinawong pagtapos sa usa ka krisis? Unsa ka hamtong ang media sa pagbalita sa mga panghitabo? Ug unsa ka hinog ang bag-ong gobyerno sa paghupot og pag-atubang sa maong problema subay sa unsay tukma sa usa ka nasud? Igo na ang gihimong pagbasol sa mga senador sa media nganong nabuling-bulingan ang atong imahe isip usa ka nasud. Sa pagsidlak sa bituon nilang Charice Pempengco, Arnel Pineda, Efren Piñaflorida o si Manny Pacquiao nga mga produkto sa international media, aduna ba’y giluwatang pasalamat ang atong gobyerno? Nganong karon nga igo lang nisaysay ang media sa unsay tinuod nga nahitabo sa nasud atol sa usa ka duguong adlaw, nganong pirti man nga naka-kisi-kisi sa atong mga senador?

Email: rico_lucena@abs-cbn,com or [email protected]