Globelines walay klaro

Dugay na kaayo nga nakadungog ko og daghang reklamo kabahin sa dili maayo nga serbisyo sa Globelines sa Innove Communications, Incorporated. Ang uban miluom na lang kay hasolan nga moreklamo. Bisan ako, nakasuway nga mireklamo ko didto sa ilang Globelines office sa Ayala diin dugay kaayo ko nga nagpaabot.

Dihang ako na nga turno sa pag-atubang sa customers service personnel, nabantayan nako nga ang mi-entertain nako dugay makasabot, daw hinay og sentido komon.

Kun mangita kamo og pruyba sa giingon nako nga dili maayong serbisyo, aria kining among silingan diri sa barangay Apas aron sultihan mo niya sa iyang kahiubos.

Mas maayo tingali nga magmaskara mo daan sa dili pa moari gawas kun wala mo’y uwaw.

Dugay na g’yud unta ko mohisgut niini, apan duna ko’y mga kauban sa media nga mitambag nga ayaw lang kuno kay “maikog kita sa Globe.”

Kaniadto god, ang Globe pirmi nga moimbintar sa media sa Christmas party ug dad-on pa nila og “outing” sama didto sa Bantayan, Bohol ug diha sa usa ka luho kaayong resort sa Lapulapu.

Apan maayo nga tukion nako kini aron sila makabantay. Samtang magputol-putol ang akong internet, wala na lang ko maglangas kay gitudloan man ko sa higala nako nga technician unsay buhaton. Mao balik ra sab dayon. Kaniadtong Hunyo 28, 2010, giputlan ko kay kuno daku na ang akong bayranan. Huna-huna nako, subra pa man sa usa ka buwan. Giadto nako ang Globelines sa SM City.

Duna kuno’y bayad nako nga gi “revert” sa ato pa wala irekord nga akong bayad, kay may nasipyat kuno’g bayad ngari sa akong account. Nahibulong ko kay sigi man sab ko’g bayad, usahay tinagorha ka buwan.

Apan wala na lang ko motingog kay wala ko’y ebidensya. Saon ilabay man dayon nako ang akong resibo. Gihutdan nako’g bayad ang P2,094.33 kaniadtong Hunyo 29.

Sa ato pa, gikan adtong adlawa, wala na ko’y bayranan. Apan pagka Agosto 26 dihang mibayad na usab ko didto sa Globelines sa E-Mall, uy P2,900 na man kuno. Gibayran ra nako og P1,000 kay miprotesta ko. Miadto ko sa Globelines Ayala ug mireklamo. Giingnan ko nga nasayop sila. Usbon kuno nila. Dili kuno P2,900 kun dili P1,900 ra unta kuno kapin. Unya kay mibayad na man ko’g P1,000 kapin na lang sa P900. Timan-i ha, kana kaniadto nang Agosto 27 pag-adto nako sa Globelines Ayala nga mireklamo.

Apan kagahapon, giputol sa Globelines ang akong telepono. Abi ninyo og unsay rason? Ang akong bayranan miabut na usab kuno og P2,976.83. Fixed kining akong linya, P995 ang buwan kay internet ra man ang akong giapas.

Tulo man kini kabuok ang akong cellphones ug may PLDT lines ko mao nga dili kaayo kinahanglan ang Globelines sa tawag.

Awhag nako sa mga higala ko sa Globe, susiha kuno ninyo kining maong binuang aron dili ma-discourage ang uban sa pagkuha sa inyong serbisyo.

*  *  *

Sigurado ko nga mag-atubang og dakung problema ang kadagkoan sa Sikatuna Security Agency kay daghan sa ilang mga gwardya nga andam na moreklamo batok kanila.

Kini tungod kay samtang gisigihan sila og “deduct” og para sa Social Security System (SSS), PhilHealth ug Pag-IBIG, nahibaw-an sa mga gwardya nga wala man kini gi-remit sa maong mga ahensya.

Gipakita g’yud ko sa mga gwardya sa certification sa SSS nga wala silay ngalan didto. Kun duna man, wala silay contribution sa tuig 2009 ug hangtud karon.