Ang tawhanong pagpakasala ug ang Diosnong kaluoy

Nahimong kabahin sa Rabbinic Tradition kining maong mga pahimangno: “Likayi nga walay si bisan kinsang tawo nga makigsuod ni moduol sa mga makasasala o magdala kanila ngadto sa Torah” (cf. Mekilta 57b alang sa Exod. 18;1). Ang pagpakaon sa mga Makasasala maoy usa ka dalaygong buhat. Apan ginadili ang pakigsalo kanila. Mao kini ang hinungdan kun nganong nasuko pag-ayo ang mga Pariseo sa pakigsalo ug pakig-uban sa atong Ginoong Jesus sa mga tawong giisip nga makasasala sa ilang kapanahonan apil na niini ang mga Kobrador sa Buhis. Butang nga nakapatukmod sa atong Ginoo sa pagsaysay sa mga sambingay kalabot sa Sensilyo nga Nawala, Karnero nga Nawala ug Anak nga Nawala o Anak nga Mausikon.

Ang Punto sa matag Sugilanon ang nagpunting sa usa ka makuti ug makugihong pagpangita sa usa ka butang nga giisip nga bililhon sa tag-iya nga sa dihang kini nakit-an na ang nagdala og dili hitupngang kalipay. Gigamit kini sa atong Ginoo aron pagpamata pinaagi ning maong mga sugilanon sa mga Pariseo nga kitid kaayo og panlantaw sa kinabuhing mapasayloon.

Mahimong sabton ang Pagpasaylo ning mosunod:

a. Intelekwal nga Pagpasaylo-Nasayud kita sa rason kun nganong pasayloon ang tawo apan wala nato kini batia.

b. Emosyonal nga Pagpasaylo-Pagsinati niini diha mismo sa atong kasingkasing.

c. Espiritwal nga Pagpasaylo-Pagdala sa Nakasala kanato diha sa atong kinabuhi sa Pag-ampo. Hinuon, daghan ang maglisud pagpasaylo tungod kay nagdumili sila pagsinati sa pasaylo nga gihatag sa Dios diha sa ilang kinabuhi.