EDITORYAL - Kinsay mo-ombudsman sa taga-Ombudsman?

Mitumaw sa fact-finding investigation sa palpak nga operasyon sa hostage-taking didto sa Quirino Grandstand sa Manila nga ang napatay’ng hostage-taker nga si Sr. Insp. Rolando Mendoza gikilkilan og P150 mil ni Deputy Ombudsman for military and other law enforcement offices Emilio Gonzales III bugti sa paborableng desisyon sa kaso niini.

Imbes mosanong sa imbitasyon sa incident investigation and review committee (IIRC), si Gonzales misulat sa nangulo sa maong komitiba nga si Justice Secretary Leila de Lima pagpahibalo nga dili siya motambong sa imbestigasyon. Gihimong rason ni Gonzales ang Ombudsman nga usa ka independent body.

Bisan sa pagdumili pagtambong ni Gonzales ug ni Ombudsman Merceditas Gutierrez, imbitahon gihapon ni de Lima ang mga taga Ombudsman, ilabi na si Gonzales nga napasanginlang nangilkil sa napatay’ng hostage-taker. Ang deputy negotiator sa hostage crisis nga si Chief Insp. Romeo Salvador maoy nakatug-an sa komitiba nga iyang nadunggan si Mendoza nga nagkanayong ““P... mo... humihingi ka pa ng P150,000 para sa kaso ko!”

Nasayod si Gonzales ug ang iyang boss nga si Gutierrez nga usa ka sensitibong insidente ang giimbestigar sa komitiba ni de Lima tungod kay naglambigit kini og mga napatay’ng hostage nga mga turistang Intsik nga taga Hong Kong, busa mahimo nilang isalikway ang ilang pagka-independete sa ngalan sa hustisya sa maong mga biktima.

Usa pa, unsay mawala sa Ombudsman kun silang mga opisyal nianang maong constitutional body motambong aron pagpanubag sa fact-finding committee?

Dili angayan ikahadlok ni Gonzales ang panukitsukit kun dili tinuod nga iyang gikilkilan si Mendoza og P150 mil.

Hangtod maprobar sa korte ang pasangil batok ni Gonzales, isipon siyang inosente sa mitumaw nga impormasyon nga pagpangilkil.

Dili na bag-o alang sa mga Pilipino ang mga estoryang binaligyaanay og kaso. Ug wala lamang masayod ang kinabag-an kun apil ba niini ang Ombudsman, hangtod nayagyag kini diha pa gyud sa IIRC nga nag-imbestigar sa hitabong nakahatag sa Pilipinas og kaulawan sa kalibutanong komunidad.

Apan kun tinuod nga nangilkil si Gonzales kang Mendoza, kinsa man ang mo-ombudsman niya?

Kinsa ang mo-ombudsman sa taga-Ombudsman?