Good luck sa mga bar examinees

Kaniadtong miaging Domingo gisugdan sa 5, 012 ka mga examinees nga gustong mag abogado ang unang Domingo sa pinakalisod nga eksaminasyon sa nasud - ang Bar Examination.

 Sigun sa talaan sa opisina sa Bar Confidant adunay 5, 038 ka mga graduwado sa kursong abogasya sa tibook nasud ang miduso sa ilang petisyon aron mokuha sa Bar eksaminasyon ning tuiga apan 19 kanila ang wa modayon ug ang 7 wala tugoti sa korte Suprema nga makakuha sa eksaminasyon.

Ang Bar eksaminasyon pagahimoon sulod sa upat ka Domingo matag buwan sa Septembre sa matag tuig ug adto kini pagahimoa sa Dela Salle University sa kaulohan. Adunay walo (8) ka mga subjects ang Bar eksaminasyon ug gibahin kini ngadto sa tag duha ka subject matag Domingo nga kuhaon sa mga examinees sa buntag ug hapon.

Sa unang Domingo mao ang Political Law nga ihatag sa buntag ug ang Labor Law nga ihatag sa pagka hapon. Sa ikaduhang Domingo mao ang mga subjects Civil Law nga ihatag sa buntag ug ang Taxation nga ihatag sa hapon. Ang ikatulong Domingo gigahin sa Commercial Law nga ihatag sa pagka buntag ug ang Criminal Law sa pagka hapon samtang ang Remedial Law ug Legal Ethics mao ang ihatag sa buntag ug hapon sa ikaupat nga Domingo.    

Ambot og pagpasayon o pagpagaan ba kaha sa trabaho sa mga examiner ug examinees, ang korte suprema mihimo na og mga kausaban sa Bar examination.

Kaniadtong miaging tuig gisugdan sa Korte Suprema ang pagbutang og tag duha ka examiner sa matag subject. Sa sunod tuig sugdan na usab sa pagpatuman sa labaw’ng hukmanan ang paghatag og multiple choice nga type sa eksaminasyon.

Matud pa sa among magtutudlo sa Criminal Law Review nga si Atty. Jeffrey Ravelo, 60 porsiyento ang multiple choice ug 40 porsiyento ang alang sa paghimo og memorandum sa kaso ang type sa eksaminasyon nga ihatag sa sunod tuig.   

Ang mga kausaban nga gipasiugdahan karon sa Korte Suprema mahitungod sa Bar Examination usa ka welcome development alang sa mga gustong mag abogado ug ako nanghinaut nga mao nay isunod sa labaw’ng hukmanan ang paghimong regional sa mga mosunod nga Bar examinations aron dili na kaayo madak-an sa ilang gasto ang mga taga probinsiya nga gustong mag abogado. 

*  *  *

Happy Birthday diay sa akong kaluha Hennah Marie ug Hannah Marie nga nagsaulog sa ilang ika napulo ka tuig nga adlaw’ng natawhan karong adlawa. Greetings usab gikan nila kuya Nenen ug kuya Jay ug ate Honey Vive.