EDITORYAL - Anti-dengue campaign angay seryosohon

Angayan na'ng seryosohon sa mga local government units (LGUs) sa lalawigan sa Sugbo ang kampanya batok sa dengue niini karong pagdaghan sa mga biktima niini.

Daghan gihapong mga lungsod ug siyudad sa lalawigan nga mibalewala sa maong sakit gikan sa lamok bisan mikutlo na kini og ubay-ubay na nga kinabuhi.

Sumala sa rekord sa Kapitolyo, 10 ka mga lungsod ug siyudad sa lalawigan ang gihasi niining maong sakit. Nag-una ang dakbayan sa Toledo nga adunay 99 ka kaso; dakbayan sa Talisay, 89; dakbayan sa Danao, 88; Balamban, 86; Minglanilla, 61; Asturias, 53; dakbayan sa Bogo, ug Daanbantayan, 41; Lilo-an, 40; Argao, 38 ug Medellin, 37.

Ang kagamhanan sa dakbayan sa Sugbo, pinaagi ni Mayor Michael Rama mireklamo na tungod kay sa 28 ka pasyente sa dengue sa Cebu City Medical Center (CCMC), hapit mokatunga niining maong gidaghanon naggikan sa lalawigan sa Sugbo.

Maayo tingaleng seryosohon ni Gob. Gwendolyn Garcia ang kampanya sa dengue sa lalawigan pinaagi sa paghatag og suporta sa mga district hospital aron mahimo na lang tambalan ang mga pasyente sa dengue sa ilang mga lungsod ug siyudad nga mahimo nang dili dad-on dinhi sa Sugbo.

Gihimo karon ni Bokal Sergio Restauro nga maoy nangulo sa Task Force Dengue ang fogging operation sa mga lungsod. Dili paigo ang pagpa-aso sa mga lugar nga gituhoang gidugok og daghang lamok tungod sa pagtuo sa mga eksperto nga sayon kaayo silang makabalhin sa laing lugar kun adunay masingo nga aso gikan sa fogging machine. Daghan usab ang nagtuo nga makadaot kini sa panglawas sa mga tawong makahanggab sa aso.

Ang pagpa-aso usa ka matang sa "prevention" aron mapugngan ang pagdaghan sa mga lamok, ilabi na ang Aedes Aegypti nga maoy nagdala sa virus nga hinungdan sa dengue fever.

Apan bisan unsaon sa pagpa-aso o bisan unsaon sa pagpugong nga dili modaghan, limitado kaayo ang gibuhat sa mga tawo taliwala sa kadaghan niining maong klaseng insekto.

Gawas sa pagpugong, angayan usab maninguha ang mga LGUs, ilabi na ang Kapitolyo nga maluwas ang mga Sugboanon nga mapaakan ug mataptan og sakit nga dengue. Kini mahimo lamang kun subsob ang pagsuporta sa Kapitolyo sa mga district hospitals nga kasagaran nanghibiyaan, ilabi na sa suplay sa tambal ug mga personahe.