EDITORYAL - Pagkatig-a ni Gloria Diaz

Wala makabantay ang mga Sugboanon.

Si Gloria Diaz mipahimulos sa kahigayonan aron mobalik ang iyang pagkasikat karon nga dugaydugay na siyang walay proyekto nga pelikula.

Angayang dad-on ngadto sa kauluhan ang singgit sa mga Sugboanon batok kang Diaz karon nga iyang gibali ang sitwasyon: nga ang mga taga Sugbo maoy angay mangayo og pasaylo ngadto kaniya kay nasayop og interpret sa iyang pamahayag atol sa interbiyu sa usa ka estasyonan sa telebisyon sa dihang gikuhaan og reaksiyon kalabot sa “major, major problem” nga tubag ni Miss Universe 2010 4th runner up Maria Venus Raj.

Ang mga Sugboanon pa ang iyang gihadlok nga dili na siya moanhi dinhi sa Sugbo hangtod dili mangayo og pasaylo ngadto kaniya ang mga Sugboanon.

Daghan nang mga organisasyon ang nanawagan nga papangayoon og public apology si Gloria Diaz ngadto sa mga Sugboanon tungod sa pagpanaway niini sa mga Sugboanon nga dili makamao mo-English.

Gani, ang Vice Mayor League of the Philippines Cebu Chapter miluwat og resolusyon pagdeklarar kang Gloria Diaz nga persona non grata dinhi sa Sugbo.

Kababayen-ang Sugboanon ang nasakitan sa pamulong niya, busa tig-a ra kaayo si Gloria Diaz kun dili siya mangayo og pasaylo sa nasakitan sa iyang gipamulong.

Kun sa iyang hunahuna, wala siyay sayop sa iyang gipamulong ug wala siyay intensiyon nga mopasakit og tawo sa iyang reaksiyon, apan unsa may nakalisod nganong dili man makahubit ang iyang mga baba sa pagpangayo og pasaylo sa nasakitan sa iyang pulong nga wala tuyoa?

Ang nasakitan sa mga Sugboanon mao ang paghingalan sa “Cebuana” nga ang topic sa interbiyu mao ang kataw-anan nga tubag ni Venus Raj sa Q and A sa Miss Universe pageant. Ug si Raj usa ka Bicolana, dili Cebuana.