Husto si 1969 Miss Universe Gloria Diaz sa iyang punto nga aron dili masami ug maapektuhan ang kahigayonan sa atong mga kandidata sa mosunod nga mga international beauty pageants pagsakmit sa korona angayang gamiton nila ang pinulongan nga komportable sila nga mosulti.
Ang sipyat lang ni Diaz nga maoy hinungdan sa kasuko sa ubay-ubay nga mga Sugboanon mao nga, sama sa tubag ni Miss Universe 2010 4th Runner-Up Venus Raj sa pangutana atol sa pageant, wala niya mamaayo og han-ay ang iyang gipanulti nga nakapainsulto sa mga Sugboanon.
Tingali dili niya tumong ang pagpanginsulto natong mga Sugboanon sa iyang paghimong sanglitanan sa usa ka Cebuana nga maglisod og sulti sa pinulongang Ininglis ug Tagalog, apan ang iyang pagka-arogante ug kakuwang sa maayong pamatasan maoy nakahaling sa kasuko sa ubay-ubay nga mga Sugboanon.
Bastos alang nako ug nagpakita nga siya nakaminus natong mga Sugboanon dihang naka-ako pa siya sa pagtingsi dihang gikuhaan og reaksiyon sa kahiubos sa mga Sugboanon sa iyang gipanulti.
Gituyo man niya o wala ang pagpanginsulto, dili malalis ang kamatuoran nga dunay mga nasakitan sa iyang pamahayag. Ang usa ka normal nga tawo, bisan kun wala niya tuyo-a nga makapasakit sa balati-an, mangayo gyud kini og pasaylo sa mga gisakitan sa iyang nahimo.
Labihan ka insensitive ug ka arogante ni Diaz nga bisan sa pagdako na sa kontrobersiya nakaako pa siya sa pagtingsi. Karon mao pay midemanda sa mga Sugboanon nga mangayo og pasaylo niya kay kun dili di na siya mobiyahi dinhi sa Sugbo.
Ang tinuod dili magsakit ang tiyan sa mga Sugboanon kun dili ka moanhi sa Sugbo tungod kay numero uno dili na sab ka welcome dinhi human ang Vice Mayor’s League mideklarar nimo nga persona non grata.
* * *
Dili hinuon tanang Sugboanon ang nasuko ni Diaz tungod kay duna poy nilaban niya. Usa nila si Senador Serge Osmeña. Matud ni sa Sugboanong senador nga wala lang hisabti si Diaz sa iyang gisulti.
Kun atong paundayonan si Osmeña, usa sa wala makasabot sa gisulti ni Diaz mao si Kongresista Cutie del Mar nga mi-deliver og privilege speech didto sa Kongreso niadtong miaging adlaw.
Dili sab tingali, siguro sama sa daghang mga Sugboanon, si del Mar nakasabot pud sa punto ni Diaz apan ang iyang paghimo sa Sugboanon nga sanglitanan maoy nakapasuko niya.
Sa ako nang giingon usa ra gyuy problema ni Diaz, wala niya maayo og han-ay ang iyang gisulti.
* * *