Grabeng hostage crisis

(Part 2)

Nagpadayon ang imbestigasyon sa nahitabong labing duguon nga hostage crisis sa kasaysayan sa nasud. Samtang didto sa Hongkong, nagpadayon ‘sab ang mga lakang pagprotesta sa gihimong aksyon sa gobyerno aron masumpo unta ang linuog nga krimen. Samtang nagpadayon ang kontrobersya, mas makatabang nga mobangon gikan sa kauwaw pinaagi sa pagpakita sa kalibutan nga dinhi sa Pilipinas, adunay makab-ot nga hustisya sukwahi sa gipakigbisogan ni Police Inspector Rolando Mendoza. Apan aduna pay mas grabeng ‘hostage fiasco’ nga nahitabo sa kasaysayan nga angayan natong kapanaminanan ug tan-awon aron mas mahatagan ‘ta sa kaisog nga wa’ ta mag-inusara sa pag-atubang sa susamang kauwaw.

4. Eloa Pimentel- Ang 15 anyos nga si Eloa Cristina Pimentel gidagit sa iyang kanhi uyab nga si Lidemberg Alves. Nabantog ang maong hostage crisis tungod sa lapad nga media coverage sa kinatibuk-ang krisis. Apan mas nga nahimong kontrobersyal ang insidente tungod sa matod pa, sayop nga pag-hupot sa mga pulis sa Sao Paulo sa maong krisis. Niabot og 100 ka oras ang hostage crisis, ang labing taas nga hostage drama sa Sao Paulo. Nahimong dugoon ang insidente dihang gipatay gyud sa suspek ang suod nga higala ni Pimentel nga si Nayara Silva.

3. Gracia and Martin Burnham- Protestant missionaries sa Pilipinas ang magtiayon uban ang Tribes Mission su’d sa 17 ka tuig. Apan niadtong 2001, gi-hostage ang duha sa grupong Abu Sayyaf Group. Samtang gibuhian ang uban nga mga biktima sa kidnapping human makabayad og ransom, ang uban gipamatay sa bandidong grupo. Nabantog sa kalibutan ang pagdagit sa magtiayon nga Burnham nga niabot og kapin sa tuig. Unang nangayo ang grupo og $1M isip ransom apan niabot lang sa $300,000 ang nabayad. Nagdumili gihapon ang mga terorista sa pagbuhi sa duha. Niadtong June 7, 2002, gisu’ng sa armadong kusog ang lugar sa mga rebelde. Apan nakalas si Martin human maigo sa tulo ka bala sa dughan samtang ang iyang kapikas nga si Gracia naigo sa paa. Mas nabantog ang ilang kasinatian sa kamot sa mga terorista human mopagawas og duha ka libro si Gracia nga nagsaysay sa ilang kasinatian uban ang mga Abu Sayyaf.

2. Roy Hallums- American contractor nga gidagit sa Iraq niadtong 2004. Su’d sa 311 ka adlaw, gihimong hostage si Hallums sa mga Iraqi dihang gisu’d sa mga nauwahi ang gi-trabahuan sa Amerikano sa Mansour District. Lakip sa gi-hostage ang iyang kaubang Pinoy nga si Roberto Tarongoy, Inus Dewari sa Nepal ug lain pang tulo ka Iraqi. Nabantog ang pagdagit kang Hollums human mogawas ang video nga nangayo siya og tabang nga mabuhian siya samtang adunay nagtutok nga armas sa iyang ulo. Gisu’ng sa mga American troops ang lugar aron sa pagluwas kang Hallums apan naka-ikyas ang mga hostage takers.

1.Father Lawrence Matin Jenco- Gi-hostage ang Amerikanong pari sa Beirut sa lima ka armadong lalaki niadtong Enero 1985. Nag-alagad ang pari isip director sa Catholic Relief Services sa Beirut. Sa dihang nakabuhi, gipakita sa pari ang mga painting sa mga tawo nga ni-hostage niya nga mga Shiite Muslims. Giangkon sa pari nga ang iyang pagtuo ug pag-ampo ang nakapa-sustiner niya luyo sa kasakit nga gi-antos sa kamot sa mga hostage taker.   Tungod sa iyang pagkadagit, nag-antos ang pari sa sakit sa mata. Naka-angkon ‘sab siya og mga bun-og sa lawas. Apan bisan sa kapait nga nasinati sa mga hostage taker, wa’y pagdumot ug pagpanimawos nga nabati ang hostage taker.

Ang nahitabong hostage crises sa kalibutan nagpahinumdum nato nga wa’ ta mag-inusara sa pagsagubang sa susamang problema. Karong nahitabo na ang krisis, di’ na dakong pangutana,kung unsa ang sitwasyon kung wa’ pa mahitabo ang insidente. Husgahan ‘ta sa kalibutan kung unsaon nato pagtugkad ang imbestigasyon ug unsaon sa pagsilot sa mga tawo nga nakahimo og kasaypanan nganong nahitabo ang hostage drama sa kaulohan.

* * *

Email: [email protected] or [email protected]