EDITORYAL - Sakay sa kahigayonan

Gisakyan sa minoriyang mga kongresista nga mga kaalyado ni kanhi presidente ug karon Pampanga Rep. Gloria Arroyo ang kahigayonan karon nga init ang pagsaway sa publiko sa palpak nga operasyon sa kapolisan sa Manila sa hostage crisis atubangan sa Quirino Grandstand sa Rizal Park.

Ang pagkomparar sa mga pro-Arroyo congressman sa administrasyon ni Arroyo sa administrasyon ni Aquino sa pag-handle og hostage crisis dili na unta angayan.

Sakto ang tigpamaba ni Arroyo nga si Elena Bautista Horn nga ang mga polis nga malampusong misulbad sa mga hostage crisis panahon sa iyang gobyerno susama nga mga polis nga mipalpak sa hostage crisis sa Quirino Grandstand.

Kun sa panahon kaniadto ni Arroyo, wala pa mapunta sa korupsiyon ang budget alang sa modernisasyon sa kapolisan, dili unta mogamit og gaan ug gamay kaayong maso ang SWAT nga mibukbok sa bildo sa tourist bus, ug dili unta mogamit og pisi nga i-abli sa pultahan nga gisirad-an gamit ang hydraulic system, ug dili pa unta mag-atras-abante kay naglibog sila unsaon sa pagsulod ang bus.

Maayong ipangutana ni Horn, Quezon Rep. Danilo Suarez ug Albay Rep. Edsel Lagman ngadto sa ilang amo nga si Arroyo kun unsay nahimo nila sa kapolisan kaniadto ug nganong sa hostage situation sa Quirino Grandstand walay mga gamit (pananglit gas mask) ug milutaw nga walay training ang mga polis.

Wala pay 100 ka adlaw sukad nakalingkod si Aquino sa Malacañang, apan daw usa ka tuig na ang gidaghanon sa mga problema nga gibilin ni Arroyo nga si Aquino ang nakasawo ug nakapanglimpyo.

Ang nakaparat, ang kaalyado ni Arroyo nakuha pa nga magkomparar sa pag-handle og hostage situation kay kaniadto lagi wala may kinabuhi nga nakalas. Ang angay gani nilang himuon ang pag-deny nga dili sabotahe sa kagamhanang Aquino ang maong palpak nga operasyon sa hostage crisis.

Tungod kay inay magsilbe untang "proactive opposition" ang grupo ni Arroyo niining krisis sa pamolis karon resulta sa hostage taking nga mikalas og siyam ka kinabuhi, wala hinuon silay puas sa pagguba sa administrasyong Aquino.