Unsay angay buhaton?

Kun dunay mga tawo nga dakponon nga dili gusto nga mokuyog sa mga polis o mga tinugyanan sa balaud nga modakop kanila, unsa may angay nga himoon?

Angay ra ba nga biyaan sila sa mga polis ug sila morason ra sa ilang mga opisyal nga wala sila’y mahimo kay dili mokuyog ang dakponon?

Nakapangutana ko niini kay mao kini ang nahitabo dihang gipugos sa kapolisan pagdakop ang igsoon niadtong dismissed nga polis nga nang-hostage.

Buyno, kun ako ang pangutan-on, dili ko makadirekta pagtubag, dili sama sa uban nga igo lang gani nakatan-aw sa coverage sa TV, diritso og kumentaryo.

Ang pangutana mao kini. Kadtong tawo nga igsoon sa polis nga gipugos nila pagdakop nakahimo ba gayud og salaud? Kun nakahimo man gani siya og salaud, aw angay g’yud nga dakpon.

Apan ang report gud mao nga kadtong polis nga buot nila dakpon igo lang mikontak sa iyang igsoon nga hostage-taker aron awhagon nga dili niya idayon kun unsa man ang anaa sa iyang kaisipan.

*  *  *

Ingon niini ang sitwasyon nga nasinati sa mga sakop sa Cebu City Anti-Indecency Board (CAIB) nga midakop sa duha ka masahesta sa Authentic Lingam Massage diha sa Tres Borces sa Mabolo.

Dihang dad-on na unta sa mga polis ug sakop sa CAIB ang duha ka masahesta nga nasakpang mihimo og pagmasahe sa pribadong parte sa lawas sa usa ka lalaki, si Honey Lou Yoo wala mosugot, mibabag nga madala sa polis ang iyang mga sakop.

Nagpatabang kini sa tanan niyang mga masahesta nga magkapit-bisig sila, maggunitay ba, aron dili sila madala sa mga polis. Kini maoy rason nga nagduha-duha ang kapolisan pagpugos kanila nga madala sa police station.

Unsa may angay buhaton niadtong higayona? Buyno, kun ako ang polis ug kun nasiguro nako nga nakahimo sila og salaud dakpon g’yud nako.

Ang ilang argumento nga maghuwat pa sila sa ilang abogado nga moabut usa sila mouban sa kapolisan dili na kinahanglan.

Mahimo ra man nga adto na ang ilang abogado moasikaso pagtabang sa ilang kaso sa police station.

*  * *

Dunay higayon nga ang media importante kaayo aron masayud ang katawhan unsa g’yud ang nahitabo. Sama adtong hostage-taking sa Quirino grandstand, kun wala pa ang mga TV newsmen, wala kita makakita sa hitabo.

Apan usahay ang subra kaagresibo sa mga TV cameramen ug photojournalist, makadaut sa usa ka operation.

Sa pag-inspection namo didto sa usa ka lingam massage parlor sa Banawa, ang nagpaila nga officer-in charge dili makatarung og sulti kay nagtabon man sa nawong kay anaa ang kamera sa media nagtutok kanila.

Ingon niadto, angay tingali nga mo-call off lang usa ang mga cameramen.

Dihang si Mayor Michael Rama mibisita sa Cebu City Medical Center, duna say mga cameramen nga mi-focus og maayo sa usa ka bata nga kritical kaayo sa dengue.

Alang nako dili g’yud kadto angay. Kun ibutang nato nga ikaw maoy ginikanan sa bata nga naghingutas na, unya sigihan kini’g kuha’g hulagway sa media, mosugot kaha mo? Dili tingali no?

Angay tingali nato kini nga tukion ilabi na nga nagsingabot ang kasaulogan nato sa Press Freedom week sa ikatulo nga semana sa Septiyembre.