Sa miaging semana mibisita dinhi sa Sugbo ang tsirman sa 2011 Bar examination aron ipahibalo sa mga tunghaan ang bag-ong estilo sa eksaminasyon.
Gikasabotan sa labing taas nga hukmanan nga bag-ohon ang estilo sa eksaminasyon alang niadtong gustong mag abogado. Ang bag-ong estilo sa eksaminasyon sugdan sa pagpatuman karong tuig 2011. Sigon sa gikasabotan ang 60 porsiyento sa eksaminasyon pili-pili na o multiple choice samtang ang 40 porsiyento niini igahin alang sa pag aplay sa balaod nga nakat-onan sa mga gustong mag abogado kay dinhi ang mga examinees pahimoon na og memorandum o kaha position papers sa kasong ihatag ngadto kanila.
Sa multiple choice o pili-pili nga estilo sa eksaminasyon ang mga examinees hatagan og 100 ka pangutana nga ilang tubagon sulod lamang sa usa ka oras ug tunga ug ang nahabiling oras mao ang igahin alang sa pagtubag sa usa o duha ka mga kaso nga ihatag ngadto kanila aron maoy ilang himoan og memorandum o position papers.
Ang coverage sa eksaminasyon klaro na usab tungod kay specific naman kini dili sama sa naandan nga mura ka og namingwit sa dagat. Kun kaniadto ang ihatag nga coverage sa eksaminasyon mao ra ang mga subject ug bag-ong mga balaod ug tuig sa mga bag-ong hukom sa pinakataas nga hukmanan karon dili na. Ihatag na nimo ang topic o ba kaha ang sub-topic sama pananglit sa subject nga Political Law. Sa subject nga political law kun ang focus sa examiner sa iyang exam mao ang due process of law, ang mga examinees pahibaloon na niini dili pariha sa naandan nga mura ka ni madam Auring magtagna-tagna unsa ang mogawas sa eksaminasyon.
Tungod niining maong kalamboan, makaingon na ba ta nga sayon na karon ang mag abogado? Ang pangutanang pili-pili o multiple choice sayon kaayong pamation pero lisod nga tubagon tungod kay ang ihatag nga pilianan sa mga pangutana halos magkapariha ra man. Mao ni ang hinungdan nga ang usa sa akong mga kauban nakuyawan tungod kay kun sayop na ang imong napili nga tubag sa pangutana sayop naman gyod kini. Dili pariha sa naandang estilo sa eksaminasyon nga hatagan ka og kaso kay bisan dili sakto ang imong tubag basta nakauyon lang ang eksaminer sa imong tubag hatagan ka man og gamay nga puntos.
Hinoon sa pili-pili kun wa ka makahibawo sa tubag dili ka na maglisod sa pagtubag kay puwede naman lang unya ni nimo nga botikawon.