SK, Brgy. elections angay ihinayon

Nagkalain-laing mga baruganan ang madunggan gikan sa kabarangayan apil na sa kisaw diha sa Kongreso kabahin niining umaabot nga piniliay sa Sangguniang Kabataan ug Barangay.

Daghan nang mga kongresista dili lang dinhi sa Sugbu ang mipadayag sa ilang pagsupak sa pagpahigayon sa SK ug Barangay elections karong bulan sa Oktubre.

Sa rason nga dako na daw ang gastos, bag-uhay pang nahuman ang nakalabay’ng national and local elections, panahon na daw sa pagtrabaho aron mahatag ang mga proyektong gisaad sa mga bag-ong napiling mga opisyal ngadto sa mga mingbotar kanila ug uban pa.

Samtang sa habig usab sa mga kabataan, mas daghan ang panawagan nga ihinayon gyud ang piniliay bisan pa sa gipangbatbat sa mga kongresista nga mga hinungdan gumikan kay gusto na sila og bag-ong pamunoan.

* * *

Ang kabataan karon ilabi na kadtong mga miyembro sa SK Federation sa matag barangay adunay kaugalingong mga rason, pipila niini mao nga ang uban gusto nang pahulipan ang ilang mga barangay kapitan ug mga kagawad tungod kay walay mga gamit o walay nahimong maayo sa ilang barangay.

Sa samang rason, aduna say mga batan-ong gustong maoy makahupot sa renda aron pamunoan ang ilang kabataan sa barangay tungod kay nagtuo silang mas aduna silay tumong kumparar sa kasamtangang mga naglingkod.

Hinuon wala pa kaayo kita makadungog nga adunay mga SK officials nga pabor sa pag-oktaba sa piniliay.

* * *

Apan adunay usa ka SK official, first councilor sa usa sa mga barangay sa Palompon, Leyte mitug-an nga pabor siya kay ma-extend pa ang iyang termino dungan niini ang extension gihapon sa iyang mga benepisyo sama sa honorarium ug scholarship.

Sa maong lugway sumala pa niining SK official makatabang usab kaniya aron pamunoan ang sektor nga gibiyaan sa ilang SK president kinsa kasamtangang nagtiwas sa iyang apprentice mate course sa barko.

Ang tanang mga rason nga gipangbatbat sa pabor ug dili pagpahigayon sa SK ug Barangay elections pulos sakto ug dili ikalalis nga aduna gyuy mga punto.

* * *

Tinuoray nga bag-ohay lang nakagasto og dako ang gobiyerno sa nakalabay’ng May 11, 2010 automated elections, tinuod nga panahon na aron sugdan ang pagtrabaho alang sa kalamboan sa tanang mga dapit sa nasud ug uban pang hinungdan.

Sakto usab ang pasangil nga aduna gyuy mga barangay officials ug SK officials nga nagmika lang ug walay nahimo sulod sa ilang termino maong kinahanglan na gyung ilisan.

Lain pang ikadugang nako nga pagsaway sa mga barangay ug SK officials mao ang pagkausab sa ilang kinaiya ngadto sa ilang mga kabarangay. Daghan kanila karon ang tag-as na og tinan-awan ug dili na gani halos makaila kanato.

Aduna pa dihay mao ra na og diktador, mangulata og mga tawo bisan walay ebidensya o igong rason aron sila buhatan niini tungod lang sa rason nga sila kaniadto mga ex-convict, kawatan, esnatser.

Apan kun buot tan-awon wala man siguroy dautan kun ipahigayon ang eleksyon sa schedule niini.

* * *

Tungod kay ang Commission on Elections subay sa balaod gitahasan nang daan sa paglain og pundong P2 bilyones alang sa maong petsa maong dili na rason ang pundo o gastos dili ba?

Ikaduha, ang rason nga bag-ohay pang nahuman ang national elections ug sundan dayon sa SK ug Barangay elections? Taym pa, kinsa man diay nipanday aning balaora sa pagpahigayon sa mga eleksyon? Dili ba kini ra gihapong mga kongresistang nagtagawtaw karon nga ipaoktaba una ang piniliay?

* * *

Dili ba kaha kini ilang “bayad utang kabubut-on” sa mga barangay ug SK officials nga lunod-patay nga mitabang ug mikampanya kanila sa nakalabay’ng piniliay? Taym pa sa ikaduhang higayon, dili ba non-partisan man o apolitical man unta ang barangay panahon sa national and local elections?

Unta sundon nalang kun unsay nalatid sa atong balaod. Kinahanglang mahinayon ang eleksyon sa Oktubre 2010 alang sa SK ug Barangay officials, kay kun maayo pa og labok kining mga opisyala sa ilang termino wala silay angay nga ikahadlok nga mapildi.