Ang lingam ug yoni

Wala ko makasabot ngano nga daghan ang mihimo og isyu niining lingam ug yoni massage nga mikatap karon sa Metro Cebu. Samot nang wala ko makasabot nganong mas gipadako pa kini nga isyu sa mga nagpakaaron-ingnon adunay gahum pagtudlo kanato sa isyu sa moralidad.

Mibuto kining tanan sa dihang mitiyabaw si Rene Josef Bullecer sa Human Life International ug kanhi pangulo sa Cebu City Anti-Indecency Board sa malaw-ay kunong paagi sa lingam ug yoni massage. 

Matud niya nga binastos kini nga paagi sa massage gumikan kay naglangkob man kini sa paghinol sa kinatawo. Sa laktod nga pagkasulti, wala na kini mahisubay sa lagda sa moralidad.

Gumikan niini, gusto sa simbahan nga i-ban kining maong klase sa masahi dinhi sa Sugbo. Matud pa ni Cebu Archdiocese spokesperson Monsignor Achilles Dakay nga angay lamang nga sirhan kining mga spa nga nagtanyag og lingam ug yoni massage tungod kay mosangpot kini sa imoral nga binuhatan.

Hinuon daghan nang lingam massage parlor ang gipangsirad-an. Didto sa dakbayan sa Mandaue ug Lapu-Lapu, ubay-ubay nang mga spa nga nagtanyag niini ang gipangsirad-an. Usa sa mga rason niini mao ang pagkawala kunoy permit niining maong negosyo gikan sa City Hall.

Dinhi sa dakbayan sa Sugbo, wala pay lingam o yoni massage parlor nga nasirad-an. Kini bisan pa man sa dakong kampanya, ilabina gikan sa kampo ni Bullecer ug sa simbahan, batok niini.

Sa Cebu City Council, wala pay klarong aksiyon ang mga konsehal kalabot niini. Kamulo pa karon ang diskusyon sa konseho kun tugotan ba gayud niini ang operasyon sa maong klase sa masahe.

Hinuon gitataw ni Bise Mayor Joy Young nga welcome ang maong klase sa negosyo sa dakbayan basta dili kini makalapas sa lagda sa moralidad ug nga legal ang pag-operate.

Apan imoral ba gayud ang maong klase sa masahe? Dili ba gyud kini angay nga mag-operate dinhi sa Sugbo diin adunay dakong impluwensiya ang simbahan tungod kay dinhi nagsugod ang Kristiyanismo sa Pilipinas?

Siguro alang kang Bullecer, sa simbahan ug niadtong uban nga naglantaw sa lingam ug yoni nga usa ka law-ay nga klase sa masahe, imoral kini nga patigayon ug dili angay nga mag-operate sa dakbayan.

Siguro imoral alang kanila gumikan kay sukwahi kini sa mga pagtulon-an sa Kristiyanismo. Apan nganong milambo man kining maong matang sa masahe didto sa India, Thailand ug uban pang mga nasud nga adunay dakong sumusunod sa relihiyong Hinduism?

Kun ang pagmasahe sa kinatawo nga giingong nagdala’g maayong benepisyo ngadto sa panglawas sa tawo imoral alang kanila ni Bullecer ug sa ubang mikontra niini, nganong gitugtan man kini sa relihiyong Hinduism? 

Siguro na-misinterpret lamang ang lingam ug yoni. Midayon lamang og conclude ang mga kontra niini nga immoral kini nga wala gani subaya ang mga benepisyo niini sumala sa Hinduism.

Tungod kay naglangkob ang lingam ug yoni og paghinol sa kinatawo sa ubang tawo imoral na alang kang Bullecer ug sa uban.

Apan, alang kanako, ang pagkaimoral niining lingam ug yoni anaa lamang sa hunahuna sa mga mikontra niining duha ra ritwal ilalum sa Hinduism. Kini gumikan kay ilang gihatagan og malisya kining maong klase sa masahe.

Kun ang pagpahigayon sa lingam o yoni musangpot sa pagpakighilawas tali sa nagmasahe ug sa gimasahean, sumala sa nakita ni Monsignor Dakay, nan walay kwestiyon nga usa kana ka dakong imoral. Ug sukwahi usab kana sa lagda ilalum sa Hinduism.

Walay dudang adunay mga lingam parlor nga disente ug legal nga nag-operate dinhi sa Sugbo. Ug kana dili ikalimod niadtong adunay hugaw og hunahuna nga nagkwestiyon sa ka immoral kuno niini.

* * *

Email: [email protected]