Epekto kun ibaligya ang PAGCOR
Ang mga lokal nga opisyal dinhi sa Sugbo daling mipasalig nga dili maapektuhan ang serbisyo sa katawhan kun mahinayon ang pagbaligya sa Philippine Amusement and Gaming Corporation kon PAGCOR.
Nagdawat man gud og hinabang gikan sa maong ahensya ang kasagaran sa mga local government units alang sa ilang mga programa alang sa mga kabus. Pananglitan dinhi sa lalawigan sa Sugbo, giangkon ni Gobernador Gwendolyn Garcia nga tunga sa milyon ka pisos matagbuwan ang hinabang nga ilang gidawat gikan sa PAGCOR.
Gigamit sa probinsiya ang maong pundo alang sa paghatag sa batakang serbisyo sa katawhan dinhi sa lalawigan. Ang dakbayan sa Sugbo sa ilang bahin gipaabot nga mawad-an og P3.5 milyones matag buwan gikan sa PAGCOR kun mahinayon ang privatization niini.
Tingali dili kaayo dako ang mamahimong epekto niini sa mga local government units, apan nahingawa ko nga ang grabing maapektuhan mao ang mga igsuon nato nga mga Overseas Filipino Contract Workers.
Kun mahitabo nga dawaton sa gobyerno sa Pilipinas ang $10 bilyones dolyares nga tanyag sa Malaysian consortium nga gipangulohan sa executive sa San Miguel Corporation nga si Ramon Ang isip bayad sa ilang pagtake-over sa PAGCOR nagpasabot ni nga molig-on ang dollar reserve sa nasud.
Kun kini mahitabo ang natural nga consequence mao ang paglig-on sa atong piso batok sa dolyar. Sa ato pa mominus ang purchasing power sa atong mga igsuong OFW. Laing maapektuhan niini mao ang export industry.
Minus hinuon ko sa pagtuo nga ibaligya sa gobyerno ang PAGCOR. Sigurado ko’ng daghan sa mga politiko nga nakapahimulos niini ang mosupak. Asa naman lang sila mangita og gatasan?
Nahibawo man tang tanan nga ang maong ahensiya usa lang sa gihimong gatasan sa mga kurakot nga mga opisyal. Gipahimuslan og maayo ang maong ahensiya sa daghang mga politiko.
Dili lang politiko kun dili hasta ang ubang mga suod kanila ug dili exempted ang media niini.
* * *
Hinaut na leksiyon si Sr. Insp. Vicente Velasquez sa iyang gihimo ngadto sa reporter nga si Leslie Caminade. Pasalamat siya nga naluoy si Leslie kaniya ug mao na ni ang personal nga mihangyo ngadto kang city director Patrocinio Comendador nga dili nalang hilabtan si Velasquez sa iyang pwesto.
Posible man gud unta to siya nga marelibohan sa iyang katungdanan labi pa nga gikuninitan siya sa mga sakop sa media.
* * *
- Latest
- Trending
