Pagsubok o parusa?

Di ko inakalang pawang kasawian

ang makikita ko sa loob ng bayan:

May sunog, may bagyo, may baha, may ulan

at naglahong tubig sa mga tahanan!

Pinakamalubha sa mga disaster –

tubig na nawala sa Metro at liblib;

Milyun-milyong tao ay walang maigib

matanda at bata uhaw ang kaniig!

Ang ulan at bagyo sa tuwng daraan

nag-iiwan ito ng bahang panggunaw

Pagguho ng lupa laging dumaratal

Ang nauulila’y mga mamamayan!

At ang sunog naman kapag nangyayari

buhay at kalakal siyang napipirde;

Ang mga bumbero trabaho’y nadoble –

pumatay ng apoy, magpuno ng balde!

Kailan, kailan kaya magbabago

ang ganitong swerte nating Pilipino?

Waring nagaganap parusa sa tao

kung di magtitigil malilipol tayo!

Ito kaya’y dulot ng bagong panahon

o mga pagsubok nitong Panginoon?

Baka ang marapat ay magdasal ngayon –

tayong mga taong sa sala ay baon?

Wala namang giyerang dapat sagupain

at mga dayuhang gusto’y mang-alipin;

Ang kalaban ngayon ay sarili natin

na maging matatag sa mga tiisin!

Ang mga pagsubok ay malalampasan

kung laging matatag itong sambayanan;

Tayo ay manalig sa pamahalaan 

na ito’y dadamay sa dapat tulungan!

Manalig din tayo sa sariling sikap

upang ang ligalig ay mabigyang wakas;

Ang mga problema’y maglalaho agad –

kung tayo’y kikilos – sama-samang lahat!