Taliwa sa kagutom, naglangoylangoy diay kita sa kadaghang bugas

Mao kini ang dakung irony niining atong pagka-Pilipino. Samtang daghan kanato ang gigutom, samtang giisip kita nga labing kabus nga nasud sa Asia, samtang nag-antos kita sa ka-nihit ug ka-mahal sa bugas, ug samtang giisip kita nga labing dakung importer sa bugas sa tibuok kalibutan, naglangoylangoy diay kita sa kadaghang bugas sa atong nasud, nga gumikan sa kadaghan, nangadaot ug giagup-op na lang sulod sa atong mga bodega.

Ngano man ni? Usa kini ka dakung krimen, Dro. Tiaw moy imong gipagutman ang Pinoy. Imong gihikawan ang libohang mag-uuma sa ilang income, ug imong giusikan ang minilyong salapi sa mga magbubuhis. Kun kinsa ka man, Dro, kinahanglan manubag ka niini.

Ug karon, nahunahunaan nga ang maong bugas ipanghatag kono ngadto sa mga pobre. Samot, imong gidungagan ang kasakit nga gibati sa mga kabus. Pobre pa, imo pa gyung lawgan og bugas nga bulok. Mao ni ang giingon nga adding insult to injury.

Atong nakita sa TV nga samtang gihulagway ang daghang bugas nga gi-agup-op ug gilatay-latayan sa mga insekto, simultaneously, gihulagway usab ang dugang bugas nga gidiskarga, gikan tingali kadto sa Vietnam.

Pastilan! Unya, maoy gusto ni Edcel Lagman ug kadagkuan sa oposisyon nga dili tukoron ang Truth Commission kay kono, unconstitutional, walay legal basis, busa walay ngipon.

It seems nga dili sila buot nga motuyhakaw ang kamatuoran. Tapus sa SONA, mitubag dayon sila nga ang tanang gi-alegar ni Noynoy, walay kamatuoran, walay pruyba, walay ebidensiya.

Sa ato pa, mangalipay unta sila si Lagman ug mga kauban sa pagkatukod sa Truth Commission, aron mogula ang matuod nga walay korupsyon, walay kahiwian sa pagpamalit sa bugas sa NFA, ug walay kalapasan nga nahimo sa MWSS pagpaburot sa ilang kaugalingon sa subrang mga perks and privileges.

They should welcome the creation of the Truth Commission, as this would clear their names. Sa ato pa, alang sa ilang kaayohan, kinahanglan mo-cooperate sila sa Davide Commission, aron kamatud-an nga wala silay kasal-anan.

Ang Civil Society group ug ang mga mag-uuma, miawhag sa NFA nga sa labing dali nga panahon, i-dispose ang nangalata nga bugas (kana kun makaon pa), sa dili pa ang harvest season, aron nga dili kini maka-kompetensiya sa lokal nga mga mag-uuma.

Matud nila: while the NFA is swimming in rice, the farmers are inundated in loans.! Samtang naglangoylangoy ang NFA sa kadaghang bugas, ang mga mag-uuma, nalumos sa utang.

Unya, dili diay ni imbestigahon?