EDITORYAL - ROTC angay ibalik sa college

Mitumaw na usab og balik ang diskusyon sa publiko kalabot sa pagbalik sa Reserve Officer Training Corps (ROTC) isip mandatory nga subject sa kolehiyo.

Dili malikayan nga matag karon ug unya molutaw sa hunahuna sa publiko ang maong laraw tungod sa nagkahilis na sa maayong pamatasan ug disiplina sa kabataan karon.

Apan ang mga proponent niining maong laraw nga himuong mandatory og balik ang ROTC gipangpul-an na. Kaniadto pang nakalabay’ng mga tuig nga ang Armadong Kusog sa Nasud kusganong nagduso niini, hinungdan nga matuki kini sa publiko.

Mao gihapon ang resulta, kutob ra sa diskusyon tungod kay kun adunay magbabalaod nga mo-aksiyon pabor niini, adunay daghan kanila ang mobabag -- ilabi na ang mga militanteng grupo nga nakasulod sa Kongreso pinaagi sa party-list system.

Sukad gipasar ang Akta Republika 9163 kon National Service Training Program (NSTP), ang ROTC nahimo na lamang usa ka component, uban sa laing duha nga mao ang Civic Welfare Training Service (CWTS) ug Literacy Training Service (LTS).

Ang CWTS nahimong subject sa kolehiyo, apan nahimong gatasan sa mga kurakot nga mga maestro pinaagi sa pagpangilkil sa mga estudyanteng adunahan nga dili gustong manilhig sa kanal ug karsada nga maoy sagad buhaton sa mga estudyante sa CWTS.

Sukad nahimong optional sa mga kolehiyo ug unibersidad ang ROTC, ang mga batan-on na-engganyo sa grupo-grupo. Busa ang pag-undang sa ROTC isip mandatory subject sa college gibasol sa mga awtoridad nga maoy hinungdan nga ang mga batan-ong lalaki (ug babaye) manulod sa fraternity ug gang; ug ang Armadong Kusog nagkulang og mga opisyal (kay ang ROTC maoy usa sa tinubdan sa mga opisyal sa AFP).

Ug dili na usab makamao motahod ang mga batan-on bisan sa pagbarog atol sa pag-awit sa Pambansang Awit, pagtahod ug pagtabang sa mga tigulang, wala nay kasayuran sa nasudnong mga isyu, ug nawad-an na sa pagka-nasyonalismo.

Apan dili pa ulahi ang tanan. Ibalik gyud ang ROTC isip mandatory subject sa kolehiyo.