EDITORYAL - Karon ra motingog vs. lingam massage

Daghan na sa mga lokal nga opisyal ang mikomentaryo batok sa mga lingam massage parlor nga nanguhong sa nagkadaiyang lugar dinhi sa Metro Cebu ug nahimong paboritong suroyanan sa mga turistang manganhi dinhi.

Apan nganong karon ra man sila maningog batok sa mga lingam massage parlor nga dugay-dugay naman kini nga nag-operate sa lainlaing mga lugar?

Sama sa siyudad sa Sugbo, ang lingam massage dugay na nga gikabuangan sa mga lalaki sa usa ka barangay sa amihanang distrito, hangtod nga dayag kini nga nag-operate sa uptown area.

Si Mayor Michael Rama karon lang mikomentaryo bisan kanunay na kining nag-agi-agi sa usa ka lingam massage parlor sa dalan Ramos. Si Bise Mayor Joy Augustus Young dili na hinuon kahibudngan kun mopabor siya sa lingam massage ilabi na nga ang mga operator niining maong klaseng establisamento gipanag-iya sa sama kaniya nga usa ka negosyanteng Filipino-Chinese.

Sa Mandaue, karon lang mi-react si Mayor Jonas Cortes batok sa lingam massage nga nanguhong usab sa iyang siyudad.

Kaniadto pa unta nga nagsugod ang maong mga negosyo mahimo na nga mabadlong sa mga awtoridad, ilabi na sa mga opisyal sa mga lokal nga kagamhanan ang pagmuntar og mga karatula nga nagpahibalo sa publiko nga nagtanyag sila og ingon ka-imoral nga serbisyo ngadto sa kalalakin-an.

Hinuon, adunay panultihon sa Español nga “mas vale tarde que nunca” busa mas bali nga gi-aksiyonan kini karon samtang wala pa makahimo og kadaot sa “moral fiber” sa sosyedad.

Apan maayong ma-leksiyon ang mga lokal nga opisyal, sama nilang Mayor Cortes ug Mayor Rama, nga kun adunay buksan nga establisamento sa ilang tagsatagsa ka teritoryo nga wala mahasubay sa moral standard sa komunidad, maayong mo-aksiyon dayon sila ug dili paabuton nga adunay pipila nga mahasulod sa ilang pukot una pa sila mo-aksiyon.