Kay hadlok man lagi

Mao kini ang ngalan sa investigating body nga gihimo ni Pres. Benigno Simeon Aquino III aron mo-imbestigar sa mga anomaliya sa pamunoan ni kanhi presidente Gloria Macapagal-Arroyo.

Truth, sa bisaya pa, kamatuoran. Mao kini ang ngalan sa commission kay buot ni Aquino nga matugkad ang kamatuoran sa mga pasangil nga mga pagpangawkaw, anomalosong transaksiyon ug panikas sa eleksiyon sa liderato ni Arroyo, ug aron masirad-an na ang maong mga isyu.

Pero daghan kaayo og mibarog batok sa pagpalutaw sa kamatuoran.

Ngilngig lang kaayo nga pagkadala sa grupo ni Arroyo karon nga anaa na sa oposisyon. Samtang si Arroyo ug ang pamilya niini mipasalig nga mokooperar sa Truth Commission, ang iyang mga alipures mao ang kusog kaayong misupak.

Dili katuohan.

Kay kun buot ni Arroyo nga mokooperar sa Truth Commission nga pamunoan ni kanhi Supreme Court chief justice Hilario Davide Jr., mahimo niyang maawhag ang iyang mga alipures, sama ni Raul Lambino nga tigpamaba sa Lakas-Kampi-CMD, Rep. Edcel Lagman ug iyang amiga nga si Sen. Miriam Defensor-Santiago nga mo-atras na lang sa ilang laraw nga pagkuwestiyon sa legalidad sa commission ngadto sa Korte Suprema.

Timan-i, ang Korte Suprema gipamunoan og chief justice nga loyal kaayo sa nagtudlo kaniya, si chief justice Renato Corona.

Dinhi nato makita unsa ka-seryoso ni kanhi presidente karon Rep. Arroyo, mga anak nga sila si Camarines Sur Rep. Diosdado “Dato” Arroyo ug Ang Galing Pinoy party-list Rep. Mikey Arroyo nga moatubang ug mokooperar sa Truth Commission.

Mas mo-bilib ang mga Pilipino kanila kun moatubang sila sa Truth Commission ug dili samoksamokon pinaagi sa pagkuwestiyon sa legalidad niini.

Apan kay hadlok man lagi, mao nga pababagan gyud sa mga koneksiyon aron malisudlisod ang commission sa paggukod kanilang mga sad-an sa katawhan.

* * *

Nagtuo na lang gyud ni si Byron Garcia nga wala nay makabuntog sa ilang kamaldito, mao nga bisan ang mga polis sa Traffic Group wala maka-ugpo sa iyang pagpanulong aron bawion ang motorsiklo nga gimaneho sa iyang tawo nga walay lisensiya.

Apan ngano usab kaha nga mahadlok man ang mga tawo ni Byron nga tawo ra man usab kini siya, bisan unsa kasiga iyang mata?

Maayong pangutan-on nato si Chief Insp. Andres Bayarcal nganong kurog kaayo siya ni Byron ug dali nga naka-release sa motorsiklo ni Byron.

Ang motorsiklo ni Byron nagtangag sa plakang 7536-QR gimaneho sa tawo ni Byron nga si Filomeno Rodriguez sa dihang nadakpan sa checkpoint nga gipahigayon sa San Nicolas Police Station sa dalan V. Rama. Gidakop si Rodriguez kay nagmaneho kini sa motorsiklo nga walay lisensiya, student permit lang ang dala niini.

Apan misulong si Byron sa Cebu City Traffic Group ug nakiglalis sa apprehending officer nga si SPO2 Preito Villahermosa.

Ang nakabati lang kay sa tantong lalis ni Byron ug ni SPO2 Villahermosa, si SPO2 Villahermosa na hinuon ang gihinganlan ni Byron og arogante.

Nilang SPO2 Villahermosa ug Byron, motuo mo si SPO2 Villahermosa ang arogante?

Kamo na lay hukom.

Pero pastilan usab kini si Byron, nakuhaan gyud sa camera ang kadako sa iyang tingog ug ang padako-dako sa iyang mata.

Pero, mao lagi, kun siyay pasultion, si SPO2 Villahermosa na hinuon ang arogante.

Na hala, ibutang nato si SPO2 Villahermosa ang arogante, apan unsa may tawag anang iyang gibuhat nga pag-withdraw sa motorsiklo ug gikarga gyud sa iyang sakyanan?

Kun tarong pa si Byron, nganong iya man nga gipamaneho og iyang tawo nga walay lisensiya?

Nganong gikuha man dayon niya ang motor nga sa polisiya kinahanglang bayran sa drayber ang multa nga P1,500 tungod sa pagmaneho nga walay lisensiya ug laing P1,000 nga multa sa tag-iya tungod sa pagtugot sa iyang drayber pagmaneho sa iyang sakyanan nga walay lisensiya?

Nakabayad ba si Byron sa P2,500 nga multa niya ug sa iyang tawo sa wala pa niya ikarga ang motorsiklo?

Apan nganong hadlok man si Bayarcal kang Byron?

Nganong hilabihan man kadali niyang naka-release sa motorsiklo bisan walay P2,500 nga nabayad nga multa?

Si Bayarcal mirason nga ang City Ordinance ang gigamit niyang basehan pag-release sa motorsiklo nga may multa lang nga P500 sa driving without license.

Matud ni Bayarcal, P500 lang ang gipamulta kay wala sila makadala og impounding receipt, mao nga ‘for safekeeping’ lang ang motor, dili i-impound.

Pero kun yamokmok pa tingale kadto nga drayber sa motorsiklo, seguro ko nga i-impound gyud ni Bayarcal ang motor.

Apan kay hadlok man lagi nga si Byron ang tag-iya, mao nga mikurog intawon si Bayarcal. Dali kaayong naka-release sa motor.

Mao na giingon nila, kun sa Talisay si Joavan Fernandez ang hawod. Apan adunay milabaw kang Joavan kay ang iya Talisay ra man ikomparar sa tibuok probinsiya nga dunay Byron Garcia.