EDITORYAL - Ngil-ad nga utang sa mga politiko

Ngil-ad nga panig-ingnan ang pag-uswag sa eleksiyon sa barangay ug sangguniang kabataan gikan sa Oktubre 2010 ngadto na sa sunod tuig aron lang makabayad ang mga politiko, ilabi na ang mga magbabalaod, sa utang kabubut-on ngadto sa mga opisyal sa barangay nga nakatabang kanila sa miaging eleksiyon.

Ang barangay maoy labing mubo nga politikanhong yunit sa Republika, ug kun unsa kini ka-huyang maka-apektar kini sa dagan sa kinatibuk-ang gobyerno sa nasud.

Dili ikalimod nga daghan nang mga opisyal sa barangay ang nakaon sa sistema, nangahimo na usab nga kurakot ug wala na mahasubay sa standard sa good governance ang ilang pagdumala sa barangay. Busa sibo lamang nga pang-ilisan ang maong mga opisyal dungan sa kabag-ohan sa nagdumala sa nasyonal nga kagamhanan.

Apan sama sa naandan, ang katumanan o pag-oktaba sa barangay ug SK elections nagsalig lamang sa desisyon sa mga magbabalaod, ang mga dagkong politiko nga naka-utang og kabubut-on sa mga opisyal sa mga barangay ug gipangsaaran nga dili ihinayon ang eleksiyon aron magpabilin sila sa ilang puwesto. Kini, bisan ang mga tawo wala na matagbaw sa pagdumala sa ilang mga opisyal.

Daghang kataw-anang rason ang mitumaw, apil na niini ang ka-walay pundo, aron lang makakita og basehan pag-oktaba sa eleksiyon. Apan gisupak ni Department of Interior and Local Government-7 regional director Pedro Noval Jr. ang gipasiatab sa mga dagkong politiko nga wala nay pundo.

Si Noval mismo kinsa mikonpirmar nga adunay pundo ang Commission on Elections para sa barangay ug SK elections, mikonpirmar usab nga base sa ilang pagpanukitsukit sa mga lumolupyo sa kabarangayan, kasagaran kanila ganahan na kaayong mailisan ang ilang mga opisyal tungod sa nagkadaiyang rason.

Mao unta kini ang hunahunaon sa mga dagkong politiko, ilabi na ang mga magbabalaod: representante lamang sila sa katawhan ngadto sa Kongreso busa angayan nilang respetoan ang desisyon sa katawhan nga gusto na mag-eleksiyon sa barangay, ug dili lamang ang paghunahuna sa utang kabubut-on ngadto sa mga opisyal sa barangay nga nakatabang kanila pagpadaog niadtong Mayo 10 nga eleksiyon.