Sigeng import og humay

CEBU, Philippines - Ang bag-ong labaw sa Bureau of Customs nga si Commissioner Angelito Alvarez nakapabag-o sa dagway sa adwana lukop nasud. Kini bisan pa sa mga pagsaway kaniya nunot sa nabaniog nga isyung pagpanikas sa usa ka golf competition sa Alabang.

Sumala pa sa balita nga mingaw kaayo ang mga nagkadaiyang puwerto sa nasud, bisan ang Port of Manila ug Manila International Containerized Port nga maoy nag-unang puwerto sa nasud. Kini tungod sa mga bag-ong polisiya nga gisagop ni Alvarez nunot usab sa tinguha ni Pres. Benigno Simeon Aquino III nga wad-on ang korupsiyon sa nagkadaiyang ahensiya sa kagamhanan.

Usa sa dakong trabahuonon ni Alvarez mao ang pagtuman sa iyang saad nga adunay smuggler nga ikiha matag duha ka semana.

Didto sa kauluhan, ubay-ubay nang mga personalidad nga nalambigit sa pagpalusot og mga kargamento nga walay bayad-bayad og buhis o nagpahigayon og technical smuggling nga gipangpasakaan na og kaso ni Alvarez.

Dinhi sa Sugbo, wala kita masayod kun may nakit-an na ba si Alvarez ug iyang mga imbestigador nga i-apil sa pagpasaka og kaso.

Apan maayo tingaleng dunay sampolan ni Alvarez.

Bisan gipa-undang na sa administrasyong Aquino ang pag-import og mga bugas humay, adunay negosyante nga padayong nag-import niini pinaagi sa National Food Authority (NFA).

Hinuon, lakas og kapit kining maong negosyante kay ig-agaw man og dakong politiko dinhi sa Sugbo, samtang ang broker igsuon sa mi-resign nga opisyal sa Cebu City Hall. Nakaila lang ko niining maong broker sa inisyal nga “B.S.”

Nakalinya usab kining maong negosyante sa usa sa mga dakong politiko sa nasud nga adunay konek ngadto ni Bise Presidente Jejomar Binay. Kun mahibaw-an kini ni Pres. Aquino, seguro ko nga masuko kini tungod sa wala pagtuman sa iyang polisiya pag-undang sa importasyon og mga bugas humay aron matabangan ang mga lokal nga mga mag-uuma.

*  *  *

Kawhaan ug duha ka mga korporasyon sa dakbayan sa Lapulapu gipanghatagan og award sa kagamhanan sa maong dakbayan pag-ila sa ilang natampo alang sa kalambuan sa isla.

Gikan sa maayong pagbayad og buhis ngadto sa lokal nga kagamhanan sa Lapulapu hangtod sa pagtabang sa mga molupyo nga nanginahanglan og tabang maoy sumbanan sa paghatag nila og award isip Top 20 Taxpayers sa tuig 2009.

Gitunol ang pasidungog niadtong Biyernes sa gabii, Hulyo 30 sa Sangri-la Mactan Island Resort.

Natandog ko sa gihimo sa maong mga kompaniya. Mga dagko kini silang negosyante sa Sugbo. Ang uban niini mga multi-national corporation ug mga locators sa Mactan Export Processing Zone, apan nalambigit sila sa bisan unsang buhat sa kaluoy nunot sa ilang corporate social responsibility program.

Sobra sa katunga sa maong 20 ka mga kompaniya mga locators kon mga pabrika sa MEPZ. Kini sama sa Lear Automotive Services Corp., Taiyo Yuden Phils., Inc., Pentax Cebu Phils. Corp. ug ubang daghan pa. Kini sila mga negosyante sulod sa MEPZ. Apan wala makig-away ug makiglalis sa lokal nga kagamhanan sa Lapulapu.

Ako kining gituki kay nahinumdom ko ni Efrain Pelaez Jr., tag-iya sa Marina Mall nga nakigsumpaki sa lokal nga kagamhanan sa Lapulapu kay dili gustong molukat og business permit.

Kun ang mga dagkong kompaniya sa MEPZ nagbayad og buhis sa kagamhanan sa siyudad sa Lapulapu, nganong dili man makahimo si Pelaez, pinaagi sa iyang pangangkon nga ubos sa teritoryo sa MEPZ ang Marina Mall? 

Timan-i, ang pagbayad og buhis usa ka obligasyon sa matag tawo niining nasud, ilabi na ang mga negosyante.

Maayo tingaleng susihon sa mga tinugyanan sa Philippine Economic Zone Authority (PEZA) ang Marina Mall. Base sa balita, ang second floor sa Marina Mall gideklarar nga residential.

Wala ra ba gyuy residential sa MEPZ kay kun ang establisamento nga anaa sa teritoryo sa special economic zone, kun dili industriyal, komersiyal gyud na. (BANATNEWS)