Usa sa mga proyekto ning puyang administrasyon ni Cebu City Mayor Michael Rama mao ang pagpanglimpiyo sa dakbayan ug ang pagpanindot sa mga sidewalk sa kadalanan niini.
Nakita ni Rama nga nagkinahanglan gayud og tinud-anay nga paglimpiyo tungod sa mga negatibong komento mahitungod sa hilabihang kahugaw sa dakbayan, ilabina sa downtown area.
Sa niaging mga semana, gimugna ni Rama ang Super Beautification Council (SBC), kansang unang function mao ang paglimpiyo ug pagpanindot sa mga sidewalk sa siyudad. Kining maong konseho gipangulohan ni socialite ug philanthropist Mariquita Salimbangon Yeung.
Unang misyon sa SBC mao ang pagpanindot sa mga sidewalk sa Osmeña Boulevard, gikan sa Sanciangko Street paingon sa uptown area. Nakita sa mayor nga ang Osmeña Boulevard nagkinahanglan gayud og beautification tungod kay usa man kini sa nag-unang dalan sa dakbayan.
Usa pa, matud ni Rama, ang maong dalan maoy nag-unang agianan padulong sa Kapitolyo Probinsiyal ug angay lamang nga hatagan kini og prayoridad sa maong konseho.
Maayo kini nga programa. Dako kini og ikatabang sa lakang pagpalambo sa dakbayan. Alang kanako, angay lamang nga tutokan sa bag-ong administrasyon ang beautification sa siyudad aron mabalik ang kaanindot niini.
Sa pagkakaron, dili ikalimod sa lokal nga kagamhanan nga palpak gayud kini sa natad sa paglimpiyo. Naghitak pa gihapon ang mga basura sa mga sidewalk, kanal ug creek.
Sa downtown area, dili gayud masingo ang kabaho sa ubang mga lugar niini, ilabina sa duol sa mga kanal. Kini tungod usab sa walay kontrol nga paglabay sa mga residente nga nagpuyo daplin niini.
Wala ba kamo mahibulong nga pipila lamang ka turista ang mobisita sa downtown area? Ang nag-unang rason niini mao ang kahugaw ug kabaho sa atong mga sidewalk.
Bitaw. mas pilion pa niining mga turista nga magpabugnaw didto sa mga beach sa dakbayan sa Lapu-Lapu ug ubang lugar sa lalawigan sa Sugbo kay sa mosuroy sa downtown area.
Hinuon adunay mobisita sa downtown apan kadto lamang pipila ka langyaw’ng puti nga nagsuroy-suroy dapit sa red light district sa Junquera Street mangitag mga boring. Ug kana maoy usa sa nakapalambo sa industriya sa prostitusyon sa Sugbo.
Bitaw usa sa mga wala matagad sa Cebu City Hall mao ang kampanya alang sa pagpaanindot sa dakbayan, ilabina sa downtown area diin puno sa mabulokong kasaysayan. Daghang historical landmark sa downtown ang minos ang ilang pagdani og mga bisita gumikan sa kahugaw ug kabaho sa ilang palibot.
Pipila na ka administrasyon ang nakalabay apan pabiling minos ang paningkamot sa City Hall sa natad sa pagpanindot sa siyudad. Hinuon dili sa ingon nga nagpasagad ang kanhi mga opisyal pag-beautify sa dakbayan. Aduna silay mga programa alang niini apan kulang gayud sila sa paningkamot pagpaanindot sa siyudad, ilabina sa downtown area, aron pagdani og dugang mga bisita.
Lain tuod paminawon nga ang dakbayan nga gibansagan nga “Queen City of the South” hugaw ug baho. Ug kana angay ikaulaw sa City Hall, ilabina sa mga bag-ong napiling mga opisyal.
Hinuon bisan pa man niini, labing mauswagon ang siyudad sa Sugbo bisan asang dapit sa nasud gawas sa Metro Manila. Apan dili ikagarantiya nga ang pagkamalamboon niini maoy naghakot og dugang mga bisita.
Ang tinuod mao nga daghang investment ang gibuho sa Sugbo tungod kay strategic kaayo ang lokasyon niini alang sa nagkalain-laing negosyo. Kana gumikan usab sa grabe’ng promosyon sa Sugbo isip bag-ong sentro sa komersiyo ug panalapi sa Pilipinas.
Dakong hagit sa administrasyon ni Rama ang pagpanindot sa dakbayan. Ug niining katukoran sa Super Beautification Council, angay lamang nga himuong prayoridad sa bag-ong mayor ang pagbag-o usab sa imahe sa dakbayan aron mamahimo kini nga labing limpiyo ug nindot sa nasud.
* * *
Email: yacilam@yahoo.com