For the first time sa atong kasaysayan, nga ang State of the Nation Address sa Presidente, gi-address gyud ngadto sa katawhan, sa masa, sa mga yanong lungsoranon nga di kaayo kasabot og Iningles.
Wala i-address ngadto sa mga foreign dignitaries ug ubang mga langyaw. Diha usab ang US Ambassador to the Philippines. Silang tanan nagsiga lang ang mga mata. But who cares?
Sila bitaw, Iningles man ang ilang State of the Nation Address. Di man sila mag-Tinagalog, aron sad unta di ta maglisud pagsabot sa buot nilang ipasabot.
Anyway, simple kaayo ang approach ni Noynoy. Walay rhetoric, walay gimmick, walay palami nga mga sulti, walay saad nga one million jobs a year. Direct to the point. Ug gi-address gyud ngadto sa katawhan. Mao ni ang overall nakong assessment sa unang SONA ni Noynoy.
Wala siya modaut ni Kongresista Gloria, kondili, igo lang siyang nagbatbat sa tinuod nga kahimtang sa atong nasud nga iyang nasunod. Problema ang iyang nasunod. Ug misugyot siya’g mga solusyon sa mga problema.
Ma-accomplished ba ang iyang mga solusyon? Segun sa mga tawo nga nag-alirong kaniya, ug agad sa tabang sa katawhan nga itunol ngadto kaniya. Sa ato pa, kun ato siyang pasagdan ug patuyangan sa buot niyang buhaton, dili gayud siya magmalampuson.
Sa ato pa, kun wala siyay full support gikan sa katawhan sa mga maayong butang nga buot niyang hinuon, tingalig lupigon siya sa dautang mga elemento, ang forces of evil, nga buot mudaot ug mopulpog kaniya.
Mao kini ang iyang giingon sa iyang inaugural address, nga ang katawhan, ikaw ug ako, bisag wa ka mobotar niya, maoy tinubdan sa iyang kusog. Nga kun ato siyang pasagdan, labing seguro ang forces of evil maoy mo-prevail. Angay natong hunahunaon nga samtang majority sa katawhan naglaum kaniya, ug nanghinaut nga magmalampuson siya sa iyang pagdumala sa nasud, daghan usab ang maningkamot sa iyang kapakyasan. Ang atong pagmabinantayon, naglakip na sa atong pagbantay kun unsa man nga mga kadautan nga mahimo sa administrasyon ni Noynoy.
Sa ato pa, dili kita mosugot nga maghimo siyag dautang mga buhat, sama sa nahitabo ni Marcos nga miabot siyag 20 ka tuig sa gahom, tungod kay misugot man ta. Ingonman, misugot usab kita nga muabot og siyam ka tuig si Representante Gloria paghupot sa gahom.
Gani, ato pang gilugwayan ang gahom ni Gloria isip sakop sa Kongreso. Sa ato pa, kontento kita sa iyang pagpamunoan sa nasud sulod sa siyam ka tuig. Ug duna pay purohan nga mahibalik siya sa gahom, isip Prime Minister kay daghan pa siyag sumosunod nga alang nila, walay nahimong kasal-anan si Gloria.
Busa, sa pangutana, kun magmalampuson ba si Noynoy sa iyang pagpamunoan sa nasod, ikaw ray makatubag ini, Dro, kun mosugot ka ba nga mosunod siya sa mga lakang nila ni Marcos, Erap ug Gloria.