Illegal numbers game

Ang mga sakop sa Regional Peace and Order Council (RPOC) mimando nga hingusgan ang kampanya sa illegal numbers game, sama sa masyaw.

Daghan man kaayo kini bisan dinhi sa dakbayan ug diha sa kalungsuran sa probinsya. Ngano gud tawon nga dili ko masayud nga taga probinsya man ko.

Kaila nako ang ubang mga coordinators sa masyaw didto sa among lungsod sa San Remigio apan magngisi-ngisi ra man sila kay dili man kuno sila dakpon. Bisan dinhi sa dakbayan mahibaw-an nimo nga kusug gihapon ang masyaw sa kalungsuran.

Anha ra gud mo pag-estar diha sa eskena Sikatuna ug T. Padilla panahon sa kaadlawon dili ba makita nimo ang daghan kaayong tawo nga mamalit og masyaw tipsheets gikan sa usa ka imprintahanan.

Dinhi sa dakbayan, ang pagpangimprinta og mga masyaw tipsheets wala itugot basi sa City Ordinance 1616.

Kining maong ordinansa gikwestyon sa mga tighimo og tipsheets didto sa hukmanan, pildi sila. Gidala nila ang isyu didto sa Court of Appeals, pildi gihapon sila. Mora’g gisang-at nila ang isyu sa Supreme Court ug hangtud karon wala pa g’yoy resulta sa ilang petisyon.

Sa ato pa, ang kapolisan mahimong mopadayon pagpatuman sa ordinansa sa dakbayan sa Sugbo, inay nga mohunong ang kapolisan.

Hinoon, bana-bana nako, daghan sa atong kapolisan ang wala na kaayo masayod niining maong ordinansa.

Dunay balaud nga naglatid nga ang mayor sa usa ka local government unit, sama sa dakbayan sa Sugbo, kinahanglang mohimo kanunay og seminar aron ang mga polis sa ilang dapit masayud unsa ang mga ordinansa nga mahimong ikapatuman sa ilang dapit.

Gihimo ba kini sa atong mga opisyal sa dakbayan? Ang tubag wala. Ambut kay kini si Konsehal Augustus Pe Jr. nga maoy chairman sa Committee on Peace and Order tigbasa man og mga law books, nabasahan ba kaha niya kining maong lagda.

Kun wala pa nimo kini maagii pagbasa Konsehal, basaha ang Republic Act 8551 aron ka masayud ug mahimoan nimo og lakang nga matuman sa dakbayan ang katungdanan.

* * *

Kining maong mga tighimo og tipsheets sa masyaw angay gayud nga himoan og hugtanay nga kampanya kay sila maoy kusug kaayong mangilad sa katawhan nga kuwang intawon og pagsabut.

Daghan man g’yud intawon ang magtoo nga tinuod ang gibutang diha sa tipsheets. Wala gayud intawon sila masayud nga ang kahugpongan sa mga masyaw operators mao ra ang nagbuot kun unsa nga numero ang ilang padag-on.

May mga tawo man usab gud nga ubos ra g’yud tawon og panabot nga bisan og imo pang sultihan nga dili tinuod ang tipsheets, mopadayon gihapon.

Duna man gani ko’y mga amigo nga naghimo g’yud og sumbanan aron kuno niya mahibaw-an unsay numero nga mogawas. Kataw-anan!

Tan-aw nako, kun unahon paghimo’g kampanya kining maong mga tighimo og tipsheets, sigurado nga mapiangan ang operasyon sa mga masyaw operators. Dayon, ang Kapisanan ng mga Brodkasters ng Pilipinas (KBP) o ang mga manager sa mga radyo magbantay pag-ayo nga ang ilang airlanes dili gamiton sa mapahimuslanon nilang kawani.

Duna man go’y mga announcer nga kusog kaayo nga mohatag og tip, pananglit moingon sila “Si Juan karong udto moadto sa ilang Valentin kauban ni Silvestre.”

Nagpasabot nga ang tip nga iyang gihatag, rambol – 1-10-3.

Duna go’y pipila ka announcers sa radyo nga nakwartahan tungod niining maong estelo. He! He!