EDITORYAL - Tanan pabor kang Enrile

CEBU, Philippines - Dili makuwestiyon ang kabeterano ni Senador Juan Ponce Enrile sa natad sa pagka-magbabalaod busa bisan kadtong mibahad nga moreklamo sa iyang pagpabiling presidente sa senado wala makahuygo.

Unya dihang gihimo ang botasyon kagahapon, giisip sa mga senador nga luto nang daan ang potahe ug ang ilang gihimo usa nalang ka seremonya sa daan nang gisabutan nilang si Enrile maoy ipabarog nga mangulo kanila.

Tinuod nga sa sayo pa nag-iyahay og hiwasa sila si Senador Manuel Villar ug Francisco Pangilinan nga nag-inilugay nga mahimong presidente sa senado, apan sa kaulahian misumiter sa ilang kaugalingon ug nagkahiusa pabor ni Enrile.

May mituboy kang Senador Alan Peter Cayetano, kansang bugtong boto gikan ra usab kang Enrile, apan si Cayetano giisip sa tanan nga usa nalang ka lamas sa maong kalihukan.

Tinuod kun hisgutan ang pagkupot sa mga dagkong katungdanan, si Enrile nanggungis na sa kabatid niini kay sukad pa sa panahon ni kanhi Preidente Ferdinand Marcos, diha na siya sa halangdong puwesto sa panggobyerno.

Usa sa iyang nahuptang gahum sa maong panahon mao ang pagka-kalihim sa panalipod sa nasud ug gani nabuhian niya ang maong tahas dihang nawagtang usab sa gahum si Marcos.

Busa sa edad ug sa kakaraan na sa pangatungdanan kansang liderato lig-on kaayo, makatarunganon lang ang pagsaludo kaniya sa iyang mga kaubang senador.

Kini tungod kay gituohan sa tanan nga malinawon ang ilang panag-uban ubos sa pagdumala sa tawong gituohan nilang kapiyalan nga manguna kanila.