EDITORYAL - Impeachment
Gutierrez misurambaw kang PGMA?
Si Ombudsman Merceditas Gutierrez nag-atubang karon og kasong impeachment gumikan sa kapakyas niya sa pag-imbistigar kang kanhi presidente Gloria Macapagal Arroyo kinsa gituohan sa kadaghanan nga nalambigit sa pipila ka mga kahiwian.
Usa niini mao ang nabuko nga kaso sa NBN-ZTE deal ug uban pa, nga maoy gisukaran sa kihang impeachment nga gipasaka nila kanhi ni Representante Risa Hontiveros ug kaubanan ngadto sa ika-15 nga Kongreso.
Kung unsay mga hinungdan nga wala makatuman si Gutierrez sa iyang sagradong katungdanan pag-imbistigar sa maong kaso sa kanhi pamuno nasud , siya ray nasayud.
Apan kun iya pang gituman ang iyang tahas, masayran na unta sa tanan kun may kalapasan ba gayud o wala ang kanhi pamuno nasud sa sayo pa, ug dili na unta mag-umido pa ang katahap sa kadagahan batok kang kanhi presidente Arroyo.
Ang pagpakahilom ni Gutierrez sa maong isyu giisip sa uban nga usa ka panurambaw niya kang kanhi presidente Arroyo, kay usa kini ka indirektang pagpalagot niya sa katawhan batok sa kanhi pamuno nasud.
Karon mapugos na siya sa pagdupa una sa tanan sa pagpanalipod sa iyang kaugalingon, ug ang ikaduha sa pagpanalipod niya sa kanhi pamuno nasud sa panahong ligiron na siya og sukitsukit sa mga magbabalaod nga moasal ug mogaling kaniya sa mga pangutana.
Mahimong aduna siya’y giandam nga lig-ong mga katarungan aron sa pagpanalipod sa iyang kaugalingon sa panahon sa imbestigasyon.
Sa bahin natong tigpaniid, ato nalang paabuton ang sangputanan ning tanan, uban sa pagtuo nga mahimo kining salamin niadtong mga nanarbaho sa gobyerno isip tigpatuman sa hustisya, nga kinahanglang tumanon nila ang ilang sagradong tahas , sa walay pagpinig ug dili angayang isakripisyo ang pagsalig sa publiko sa ilang katakus, gumikan lang sa personal nilang kaikog ni kinsa mang opisyal nga halangdon ug tinamod sa nasud ,apan sayon ra kaayong moduot sa mga tawong dili inila sa katilingban.
- Latest
- Trending
